Վրաստանի կրթության, գիտության և երիտասարդության հարցերի նախարար Գիվի Միքանաձեն հյուրընկալել է Ուզբեկստանի արտգործնախարար Բախտիյոր Սաիդովին։ Հանդիպումը կայացել է Ուզբեկստանի արտգործնախարարի առաջին պաշտոնական այցի շրջանակում Վրաստան։

Գիվի Միքանաձեն շնորհակալություն է հայտնել Բախտիյոր Սաիդովին Վրաստանի ինքնիշխանության և տարածքային ամբողջականության աջակցության համար և շեշտել է գործադիր իշխանությունների միջև սերտ համագործակցության կարևորությունը երկկողմ հարաբերությունների զարգացման գործընթացում։

Հանդիպման ընթացքում կողմերը քննարկել են կրթության և գիտության ոլորտներում երկու երկրի միջև գոյություն ունեցող հարաբերությունները և ապագա համագործակցության խորացման հեռանկարները։

Քննարկվել է նաև վրաց-ուզբեկական համատեղ նախաձեռնությունը՝ «ռեկտորների կրթական ֆորումը», որի նպատակն է լավագույն փորձի փոխանակման միջոցով ամրապնդել երկու երկրների բուհերի միջև համագործակցությունը։

Կողմերը նաև քննարկել են վրացի և ուզբեկ ուսանողների համար ճամբարների կազմակերպման հարցը և պայմանավորվել են, որ նշված նախագիծը կնպաստի երիտասարդների ակտիվ հանգստի մատչելիության աճին, նրանց ֆիզիկական և ինտելեկտուալ ներուժի դրսևորմանը և առողջ ապրելակերպի խթանմանը։

Ուզբեկստանի արտգործնախարարը հաստատել է իր պատրաստակամությունը Վրաստանի կրթական համակարգի բոլոր երեք մակարդակներում համագործակցության ընդլայնման ուղղությամբ։

Տեղեկատվությունը տարածում է Վրաստանի կրթության նախարարության մամուլի ծառայությունը։