«Մեր մանդատների զրկումը պարզապես ընթացակարգ չէր, դա անձեռնմխելիության վերացում էր և ճանապարհի մաքրում քաղաքականապես դրդված քրեական հետապնդման համար, որպեսզի մունիցիպալ ընտրություններից առաջ վերացնեն իրենց հիմնական քաղաքական սպառնալիքը», – այս մասին գրել է «Գախարիա՝ Վրաստանի համար» կուսակցության նախագահ Գիորգի Գախարիան սոցիալական ցանց X-ում։

Գիորգի Գախարիան արձագանքում է նրան, որ խորհրդարանը դադարեցրել է իր և իր կուսակցության ևս տասնմեկ անդամի պատգամավորական լիազորությունները։

«Մենք սա արդեն տեսել ենք. էջ Քրեմլի գրքից՝ վերցրու անձեռնմխելիությունը, հորինիր քրեական գործեր և ոչնչացրու քաղաքական այլընտրանքը», – գրել է Գախարիան։

Այսօր պատգամավորական մանդատից զրկվել է «Գախարիա՝ Վրաստանի համար» կուսակցության 12 անդամ. Թեոնա Աքուբարդիա, Աննա Բուչուկուրի, Գիորգի Գախարիա, Լևան Գոգիչաիշվիլի, Զազա Թավաձե, Բեկա Լիլուաշվիլի, Նաթիա Մեզվրիշվիլի, Բերդիա Սիճինավա, Կախաբեր Քեմոկլիձե, Ռոին Քոչորաշվիլի, Դմիտրի Ցկիտիշվիլի և Զվիադ Ձիձիգուրյ։

Քանի որ «Գախարիա՝ Վրաստանի համար» կուսակցությունը չի հրաժարվել իր խորհրդարանական ցուցակից, այս 12 անձն այսօր էլ համարվում էին Վրաստանի խորհրդարանի անդամ։ «Վրացական երազանքում» պարզաբանել են, որ մանդատների վաղաժամկետ դադարեցման հիմք է հանդիսացել նիստերին անհարգելի բացակայությունը։