Գիորգի Ամիլախվարին կզբաղեցնի Վրաստանի կրթության և գիտության նախարարի պաշտոնը։ Այս մասին կառավարության վարչակազմում կայացած ճեպազրույցում հայտարարել է Վրաստանի վարչապետ Իրակլի Ղարիբաշվիլին։
Ամիլախվարին փոխարինել է Միխեիլ Չխենկելիին, ով նախարարի պաշտոնը զբաղեցնում էր 2019 թվականից։
«Այսօր ձեզ ենք ներկայացնում կրթության և գիտության նոր նախարար Գիորգի Ամիլախվարիին։ Մինչ այդ ասեմ, որ արդեն հանդիպել եմ Միխեիլ Չխենկելիին, ով իր ցանկությամբ լքել է պաշտոնը։ Նշեմ, որ Միխայիլ Չխենկելին հաջողակ նախարար էր: Չորս տարի նա ծառայել է մեր կառավարությանը, երկրին, երիտասարդ սերնդին։ Նա իրականացրել է բազմաթիվ կարևոր ծրագրեր, հիմք դրել բազմաթիվ բարեփոխումների։ Դա Միխայիլ Չխենկելիի որոշումն ու ցանկությունն էր վերադառնալ իր ակադեմիական գործունեությանը։ Չխենկելին կշարունակի իր աշխատանքը Քութայիսիի միջազգային համալսարանում՝ որպես միջազգային խորհրդատվական խորհրդի նախագահ։ Մեր թիմի՝ կառավարության անունից ցանկանում եմ շնորհակալություն հայտնել Միխեիլ Չխենկելիին աշխատանքի համար և հաջողություն մաղթել նրան հետագա աշխատանքում»,- ասել է Իրակլի Ղարիբաշվիլին։
Իրակլի Ղարիբաշվիլիի խոսքով՝ ինքը վստահ է, որ Գիորգի Ամիլախվարին հաջողակ նախարար կլինի։
«Գիորգի Ամիլախվարին շատ հաջողակ մարդ է։ Նա շատ լավ, պարկեշտ կրթություն ունի։ Սովորել է ԱՄՆ-ում, ապա Գերմանիայում։ Ատենախոսության վրա աշխատել է Գերմանիայի Համբուրգ քաղաքի Մաքս Պլանկի հետազոտական ինստիտուտում։ Նրան շնորհվել է իրավաբանական գիտությունների դոկտորի աստիճան, դոցենտ է։ Գիորգի Ամիլախվարին հաջող աշխատանքային փորձ ունի. Նա ամենահաջողակ բուհերից մեկի հիմնադիրն է, իր ռեկտորության տարիներին այս համալսարանը հասել է մեծ հաջողությունների և շատ լավ օրինակներից է, թե ինչպես երիտասարդ, մոտիվացված մարդը պետք է ստեղծի շատ ժամանակակից, եվրոպական, արևմտյան որակի համալսարան, Դուք այդպիսի համալսարանի ստեղծողն եք, պարոն Գիորգի։ Այստեղ նշեմ, որ մինչ այժմ Գիորգի Ամիլախվարին հաջողությամբ ղեկավարում էր խորհրդարանի կրթության և գիտության հանձնաժողովը։ Դրա հետ են կապված մի շարք կարեւոր նախաձեռնություններ։ Գիորգի Ամիլախվարին տարիներ շարունակ ներգրավված է կրթության ոլորտում։ Նա շատ լավ ծանոթ է կրթության բոլոր մակարդակներում տիրող իրավիճակին, կրթական համակարգում դեռևս առկա մարտահրավերներին, և ես հավատում եմ, վստահ եմ, որ Գիորգի Ամիլախվարին լինելու է կրթության և գիտության հաջողակ նախարար։ Վերջին 2 տարիներին մենք շատ ենք խոսել կրթության խնդիրների մասին։ Նա շատ լավ գիտի, թե ինչպես լուծել առկա խնդիրները, և կարծում եմ Գիորգի Ամիլախվարին հաջողակ նախարար կլինի։ Մեզ պետք են լավ մենեջերներ, դաշտային կառավարիչներ։ Միաժամանակ ասեմ, որ Գիորգի Ամիլախվարին հրատարակել է բազմաթիվ գիտական աշխատություններ, մենագրություններ վրացերեն և անգլերեն լեզուներով։ Միաժամանակ նա աշխատել է իր ակադեմիական գործունեության վրա։ Ուստի ես ցանկանում եմ ևս մեկ անգամ հաջողություն մաղթել Գիորգի Ամիլախվարիին և շնորհակալություն հայտնել նախկին նախարար Միխեիլ Չխենկելիին»,- ասել է Իրակլի Ղարիբաշվիլին։
Գիորգի Ամիլախվարին Վրաստանի խորհրդարանի կրթության և գիտության հանձնաժողովը ղեկավարում է 2021 թվականից։
2018-2019 թվականներին Ամիլախվարին զբաղեցրել է Կրթական ծրագրերի հավատարմագրման խորհրդի նախագահի տեղակալի պաշտոնը. 2010-2020 թվականներին եղել է Թբիլիսիի բաց համալսարանի պրոռեկտոր, ռեկտոր, իրավագիտության դոցենտ. 2008-2010 թվականներին Լիտվայի «Սավերուս» ՍՊԸ ներդրումային ընկերության վրացական մասնաճյուղի «Սավերուս Ջորջիա»-ի գլխավոր իրավաբան. 2007-2008 թվականներին աշխատել է Վրաստանի պետնախարարի աշխատակազմում՝ որպես եվրոպական և եվրատլանտյան ինտեգրման հարցերով գլխավոր մասնագետ։
Գիորգի Ամիլախվարին կրթություն է ստացել իրավագիտության մասնագիտությամբ։ Նրան շնորհվել է իրավագիտության դոկտորի գիտական աստիճան։
