«Եթե իշխանության գլուխ լիներ Էկա Գիգաուրին, ի՞նչ կաներ Ռուսաստանի նկատմամբ այնպիսի բան, որը գործող իշխանությունը չի անում։ Տնտեսական պատժամիջոցնե՞ր կսահմաներ, թե՞ պատերազմ կսկսեր տարածքներն ազատագրելու համար»։ Այս մասին Վրաստանի Առաջին ալիքին հայտնել է խորհրդարանի առաջին փոխխոսնակ Գիա Վոլսկին։

Վոլսկին պատասխանել է Նիդերլանդների խորհրդարանի արտաքին հարաբերությունների հանձնաժողովում «Միջազգային թափանցիկություն – Վրաստան» կազմակերպության տնօրեն Էկա Գիգաուրիի ելույթի վերաբերյալ հարցին։

«Պատմությունը կրկնվում է։ Երբ Վրաստանում լարվածություն էր լինում և փորձում էին պահպանել միասնությունը, այստեղ հայտնվում էր ինչ-որ ազնվական, որը գնում էր և օտար երկրի թագավորի արքունիքում ծնկի գալիս ու զորք խնդրում՝ սեփական երկիրը պատժելու համար։ Ժամանակակից աշխարհում դա արդեն տեղի է ունենում խորհրդարանում ելույթ ունենալով։ Ցավալի է, որ դա այդպես է, բայց կա նաև պրագմատիկ մասը՝ ինչի՞ համար են դա անում, ինչո՞ւ, ի՞նչ չենք արել մենք։ Եթե իշխանության գլուխ լիներ Էկա Գիգաուրին, ի՞նչ կաներ Ռուսաստանի նկատմամբ այնպիսի բան, որը գործող իշխանությունը չի անում։ Տնտեսական պատժամիջոցնե՞ր կսահմաներ, պատերազմ կսկսե՞ր տարածքներն ազատագրելու համար։ Այն, ինչ նրանք անում են, դավաճանական ակտ է, որը չունի արդարացում՝ ո՛չ պրագմատիկ, ո՛չ էլ էմոցիոնալ», – հայտարարել է Գիա Վոլսկին։