«Ազգային շարժումն» այլևս չունի ոչ ինտելեկտուալ, ոչ քաղաքական ռեսուրս, բացի այն, որ մշտապես ապակայունացման վտանգ հրահրի,- ասել է Վրաստանի խորհրդարանի առաջին փոխխոսնակ Գիա Վոլսկին։

Ըստ նրա՝ սա միայն որոշակի մարդկանց, որոշակի խմբի, քաղաքական գործիչների ձգտումը չէ: Այդ ձգտումը համընկնում է Ռուսաստանի ձգտման հետ։

«Տարածաշրջանում, աշխարհում և, իհարկե, աշխարհաքաղաքական առանցքային դիրք ունեցող Վրաստանում բավական բարդ գործընթացներ են զարգանում, նրա շահերից է բխում ապակայունացումը, հակասությունների հրահրումը, լինի դա 500 մարդ, թե 1500, որոնք պարբերաբար հավաքվում են Մելիայի շուրջը։ Իհարկե, նրանք մեր քաղաքացիներն են, բայց բոլորը պետք է իմանան, որ կասկածներն ու հանգամանքները, որ ստեղծվում են այս քաղաքական ուժի շուրջ, բավականին լուրջ են, ուստի պետք է նորից մտածեն՝ ծառայում են պետությանը, թե անառողջ քաղաքական ուժին»,- ասաց Գիա Վոլսկին։