Գերմանիայում արգելվել է աջ ծայրահեղական «Գերմանիայի Թագավորություն» կազմակերպությունը, որը «Ռայխսբյուրգեր» շարժման ամենամեծ խմբավորումներից է
Գերմանիայում արգելվել է աջ ծայրահեղական «Գերմանիայի Թագավորություն» կազմակերպությունը, որը «Ռայխսբյուրգեր» շարժման ամենամեծ խմբավորումներից է։ Գերմանիայի Ներքին գործերի նախարարության հաղորդմամբ՝ խմբավորման գործունեությունը հակասում է երկրի օրենսդրությանը և ուղղված է սահմանադրական կարգի դեմ։
Ոստիկանությունը խուզարկություններ է անցկացրել խմբավորման գրասենյակներում և անդամների տներում՝ Գերմանիայի յոթ տարածաշրջաններում։ Ձերբակալվել է չորս մարդ, այդ թվում՝ խմբավորման առաջնորդ Պետեր Ֆիցեկը, ով իրեն «Գերմանիայի թագավոր» է հռչակել։
Ինչպես նշել է ներքին գործերի նախարար Ալեքսանդր Դոբրինդտը, «խմբավորման անդամները մեր երկրում ստեղծել են «հակապետություն» և ձևավորել են հանցավոր տնտեսական կառուցվածքներ»։
«Այս կերպ նրանք խաթարում են օրենքի գերակայությունը և դաշնային հանրապետության՝ ուժի կիրառման իրավունքի մենաշնորհը։ Միաժամանակ, նրանք օգտագործում են հակասեմական դավադրական նարատիվներ՝ իրենց իշխանության հավակնությունները հիմնավորելու համար», – հայտարարել է նախարարը։
Արգելքը տարածվում է նաև «Գերմանիայի Թագավորության» հետ կապ ունեցող այլ խմբերի վրա։
Ֆիցեկը «Գերմանիայի Թագավորություն» կազմակերպությունը հիմնել է 2012 թվականին։ Այն ունի մոտ 6 000 անդամ։ Խմբավորումը հրաժարվում է ճանաչել Գերմանիայի Դաշնային Հանրապետության լեգիտիմությունը։ Նրա անդամները հրաժարվում են վճարել հարկեր և տուգանքներ, ունեն իրենց անձնագրերը և վարորդական իրավունքները։