Գերմանիայի կանցլեր Ֆրիդրիխ Մերցը կոչ է անում ԱՄՆ նախագահ Դոնալդ Թրամփին օգտագործել իր ազդեցությունը Ռուսաստանում, ինչպես որ նա արել է Մերձավոր Արևելքում։

Մերցը այս խոսքերն ասել է Եգիպտոս ժամանելուն պես՝ խաղաղության գագաթնաժողովից առաջ։

Կանցլերը նշել է, որ այսօր նախատեսում է Դոնալդ Թրամփի հետ խոսել այն մասին, թե ինչ կարելի է անել միասին՝ Ուկրաինայում պատերազմը դադարեցնելու համար։

«Մենք հույս ունենք, որ ԱՄՆ նախագահը կմիանա մեզ և նույն ազդեցությունը կունենա Ռուսաստանի կառավարության վրա, ինչ այս տարածաշրջանում ներգրավված կողմերի վրա, քանի որ չպետք է մոռանանք, որ այստեղից ընդամենը մի քանի ժամվա թռիչքի հեռավորության վրա գտնվող Ռուսաստանը 3.5 տարի պատերազմ է մղում Ուկրաինայի դեմ։ Այսօր ես կցանկանայի օգտվել այս հնարավորությունից՝ կրկին խոսելու ԱՄՆ նախագահի հետ այն մասին, թե ինչ կարող ենք անել միասին՝ այս պատերազմը դադարեցնելու համար», – ասել է Ֆրիդրիխ Մերցը։

Ինչպես նշել է Գերմանիայի կանցլերը, Ղազայի խաղաղության համաձայնագիրը ցույց է տալիս, որ երբ միջազգային հանրությունը համատեղ է աշխատում, ամեն ինչ հնարավոր է։

«Սակայն սա պետք է հնարավոր լինի ոչ միայն այստեղ, այլև աշխարհի այլ շրջաններում։ Մեզ՝ եվրոպացիներիս համար, այս պատերազմը մեր ազատությանը սպառնացող ամենամեծ սպառնալիքն է։ Ահա թե ինչու այսօր, այս մեծ հանդիպման շրջանակներում, մենք նաև կքննարկենք, թե ինչ ներդրում կարող ենք միասին ունենալ այս պատերազմը դադարեցնելու համար։ Ես չեմ թաքցնի այն փաստը, որ մենք նաև ակնկալում ենք Ամերիկայի Միացյալ Նահանգների աջակցությունը և շարունակական աջակցությունը, ինչպես ապացուցվել է այս տարածաշրջանում», – ասաց Մերցը՝ նշելով, որ մեծ սպասումներով կվերադառնա Գերմանիա։