Էստոնիայի ներքին գործերի նախարար. Բալթյան երկրները դարձել են հիբրիդային պատերազմի մարտավարության փորձադաշտ
Էստոնիայի ներքին գործերի նախարար Իգոր Տարոն ասել է, որ Բալթյան երկրները դարձել են հիբրիդային պատերազմի մարտավարության մի տեսակ փորձադաշտ, որտեղ Ռուսաստանը անընդհատ փորձարկում է տարածաշրջանի պատրաստվածությունը, համագործակցելու ունակությունը և դիմադրողականությունը։
Իգոր Տարոն այս մասին խոսել է Լեհաստանի Գդանսկ քաղաքում ներքին անվտանգության համար պատասխանատու եվրոպացի նախարարների հանդիպման ժամանակ։
Հանդիպման հիմնական թեման հիբրիդային սպառնալիքների դեմ պայքարն էր և ժամանակակից տեխնոլոգիաների կիրառումը՝ Եվրամիությունը պաշտպանելու համար։
«Մենք բախվում ենք տարբեր սպառնալիքների՝ անօդաչու թռչող սարքերի, օդային տարածքի խախտումների, կարևորագույն ենթակառուցվածքների վրա հարձակումների՝ թե՛ ցամաքում, թե՛ ծովում։ Դրա դեմ պայքարելու համար անհրաժեշտ է ամրապնդել համագործակցությունը, մշակել տարբեր սցենարներ և ներդնել ժամանակակից տեխնոլոգիաներ», – նշել է Տարոն։
Ըստ նրա՝ ցամաքային սահմաններից բացի, անդամ պետությունները պետք է կարողանան պաշտպանվել ծովից և օդից եկող հիբրիդային սպառնալիքներից։
«Հիմա, ավելի քան երբևէ, այս հարցում հատկապես կարևոր է Եվրամիության աջակցությունը», – ասել է էստոնացի նախարարը։
Հիշեցնենք, որ ավելի վաղ Էստոնիայի նախագահ Ալար Կարիսը հայտարարել էր, որ Եվրոպան պետք է ռուսական ագրեսիան ընկալի որպես «տարբեր տեսակի պատերազմ» և պատրաստ լինի հիբրիդային սպառնալիքների նոր ձևերի։