«Էներգոատոմը» կանխատեսել է ճառագայթային ամպի տարածումը Զապորոժյեի ատոմակայանում վթարի դեպքում
«Էներգոատոմը» պատրաստել է Զապորոժիեի ատոմակայանում վթարի դեպքում ռադիացիոն ամպի տարածման կանխատեսումը։
Տեղեկությունը տարածում է «BBC»-ն։
Ըստ ուկրաինական ընկերության կանխատեսման՝ Զապորոժյեի ատոմակայանի վեցերորդ էներգաբլոկում վթարի դեպքում ռադիացիոն ամպը կծածկի Ուկրաինայի հարավային և Ռուսաստանի հարավ-արևելյան հատվածները։ Ընկերությունը օգոստոսի 29-ի համար նման կանխատեսում է արել՝ ելնելով օդային զանգվածի շարժման ուղղությունից ու արագությունից։
Ինչպես գրում է լրատվամիջոցը, վերջին մի քանի շաբաթների ընթացքում իրավիճակը կայանում բարդացել է ռմբակոծությունների և անմիջապես միջուկային օբյեկտի տարածքում ռուսական զորքերի տեղակայման պատճառով։ Ատոմային էներգիայի միջազգային գործակալությունը փորձում է առաքելություն ուղարկել կայան՝ իրավիճակը հետաքննելու համար։
Ուկրաինայի արտաքին գործերի նախարար Դմիտրի Կուլեբան հայտարարել է, որ ռուս զինվորականները պետք է որքան հնարավոր է շուտ լքեն Զապորոժիեյի ատոմակայանը, քանի որ նրանց ներկայությունը ատոմակայանում վտանգ է ներկայացնում ամբողջ մայրցամաքի համար։
«Միջուկային անվտանգությունը տասնամյակներ շարունակ եղել է Ուկրաինայի գլխավոր առաջնահերթությունը, հատկապես հաշվի առնելով մեր ողբերգական անցյալը: Ռուս զավթիչները Զապորոժիեյի ատոմակայանը վերածեցին ռազմաբազայի և վտանգի տակ դրեցին ողջ մայրցամաքը։ Ռուս զինվորականները պետք է լքեն կայանը: Նրանք այնտեղ անելիք չունեն»,- գրել է Կուլեբան Twitter-ում։