Վրաստանի առողջապահության նախարար Էկատերինե Տիկարաձեն ասում է, որ դեռ վաղ է խոսել այն մասին, թե երբ և ինչպես կվերացվեն կորոնավիրուսի հետ կապված սահմանափակումները:

Նախարարի խոսքով, այս փուլում երկրում վարակի տարածման ցուցանիշը կայուն է:

«Կարեւոր է նշել, որ այս փուլում մենք ունենք կայուն ցուցանիշ, վարակվածների թիվը չի անցնում 4500-ը: Մենք դեռ չենք ստացել Սև ուրբաթի էֆեկտը, որը, գիտեք, որքան դրամատիկ է արտացոլվել իրականում, որի հետևանքները մենք դեռ քաղում ենք: Հետեւաբար, դեռ վաղ է խոսել այն մասին, թե ինչպես կչեղարկվեն սահմանափակումները, քանի որ մեզ դեռ անհրաժեշտ է, որ համաճարակաբանները վերլուծեն հաջորդ ալիքը, որը կարող է սպասվել: Ինչ վերաբերում է սահմանափակումների վերանայմանը, ապա թվերը ցույց կտան: Մենք ինքնաբերաբար որոշումներ չենք կայացնում, մենք դիտում ենք վարակի աճի դինամիկան, ինչպես նաև մահացության դեպքերը: Կարևոր է հաշվի առնել կլինիկաների գերծանրաբեռնվածությունը, նրանց հնարավորություն տալ որակյալ ծառայություններ մատուցել բոլոր հիվանդներին, մենք համատեղ որոշում կկայացնենք այս ամենը վերլուծելիս», – հայտարարել է Տիկարաձեն: