Վրաստանի ինքնակառավարման մարմինների ընտրություններին կհետեւի Եվրոպայի խորհրդի տեղական եւ տարածքային իշխանության կոնգրեսը:
«Վրաստանի իշխանության հրավերով Եվրոպայի խորհրդի Տեղական եւ տարածքային իշխանությունների կոնգրեսը իր առաքելությունը կտեղաբաշխի 64 մունիցիպալիտետներում` հոկտեմբերի 2-ին կայանալիք տեղական ընտրություններին հետեւելու համար: Առաքելությունը կգլխավորի Դեյվիդ Էրեյը (Շվեյցարիա): Առաքելության կազմում են նաեւ կոնգրեսի 18 դիտորդներ 15 երկրներից: Առաքելությունը ԵԱՀԿ / ԺՀՄԻԳ և եվրախորհրդարանի դիտորդական համատեղ առաքելության մի մասն է:
Նախապատրաստական աշխատանքների շրջանակներում ընտրությունների դիտորդական առաքելության ներկայացուցիչները սեպտեմբերի 30-ին և հոկտեմբերի 1-ին կհանդիպեն դիվանագիտական կորպուսի, տեղական և միջազգային հասարակական կազմակերպությունների և լրատվամիջոցների ներկայացուցիչների հետ: Կոնգրեսի պատվիրակությունը կհանդիպի նաև ԿԸՀ նախագահ Գիորգի Կալանդարիշվիլիի, արդարադատության նախարարի տեղակալի և ազատ և արդար ընտրությունների միջգերատեսչական աշխատանքային խմբի ղեկավար Թորնիկե Ճեիշվիլիի հետ:
Եվրախորհրդարանի պատվիրակության հետ միասին նախատեսվում է ԵԱՀԿ / ԺՀՄԻԳ դիտորդական առաքելության հիմնական խմբի և երկարաժամկետ դիտորդների համատեղ ճեպազրույց: Նախապատրաստական ծրագրի եզրափակիչ մասում նախատեսվում է հանդիպում ՏԻՄ ընտրություններին մասնակցող թեկնածուների և կուսակցությունների ներկայացուցիչների, ինչպես նաև Կոնգրեսում վրացական պատվիրակության անդամների հետ:
Քվեարկության օրը Կոնգրեսի ինը թիմ կտեղակայվի երկրի տարբեր քաղաքներում և հարակից գյուղերում: Առաքելությունը կավարտվի կիրակի, 2021 թվականի հոկտեմբերի 3-ին, ժամը 20:00-ին, Թբիլիսիի Շերատոն Մեխեչի պալաս հյուրանոցում՝ ԵԱՀԿ / ԺՀՄԻԳ-ի և Եվրոպական խորհրդարանի ներկայացուցիչների հետ համատեղ մամուլի ասուլիսով», – ասվում է կազմակերպության հայտարարության մեջ:
