Դոնեցկի մարզում Ռուսաստանի առաջխաղացման հետևանքով սկսվել է 14 բնակավայրերի բնակիչների տարհանումը, այդ թվում՝ 1150 երեխաների
Ռուսական բանակի առաջխաղացման ֆոնին Ուկրաինայի իշխանությունները Դոնեցկի մարզի 14 բնակավայրերից սկսել են հարկադիր տարհանում այն ընտանիքների, որոնք ունեն փոքր երեխաներ։
Դոնեցկի մարզի ռազմական վարչակազմի տվյալներով՝ խոսքը վերաբերում է Բելոզյորսկ քաղաքին, Բլագոդատնոե, Բոկովոե, Վեսելոե Պոլե, Վեսնա, Միրովոե, Նովովոդյանոե, Սվյատոգորովկա, Վիկտորովկա, Վերովկա, Կոպանի, Նովովիկտորովկա, Նովոուկրաինկա բնակավայրերին և Դոբրոպոլյե համայնքին պատկանող Ստեպե գյուղին։
Այս բնակավայրերում ներկայումս գտնվում է 1150 երեխա։
Հարկադիր տարհանման մասին որոշումը կայացվել է արտակարգ իրավիճակների տարածաշրջանային հանձնաժողովի նիստում։
Հետագայում Դոնեցկի մարզի ռազմական վարչակազմում նշել են, որ Պոկրովսկ քաղաքում մինչ այժմ մնում է 1327 մարդ և քաղաքում իրավիճակը ծայրահեղ լարված է։
«Թշնամին կրակ է բացում քաղաք տանող բոլոր ճանապարհների ուղղությամբ, ինչի պատճառով տարհանումը խիստ խոչընդոտված է», – հայտարարել են Դոնեցկի մարզի ռազմական վարչակազմում։
Նշենք, որ այսօր առավոտյան Ուկրաինայի զինված ուժերի գլխավոր շտաբում հայտնել են, որ վերջին 24 ժամում ճակատում տեղի է ունեցել 165 մարտական բախում։ Նրանց տվյալներով՝ ռուսական բանակը Ուկրաինայի բանակի դիրքերն ու բնակավայրերը ենթարկել է երկու հրթիռային և 89 օդային հարվածի։
Բացի այդ, ռուս զինվորականները կրակ են բացել 5120 անգամ, այդ թվում՝ 64 անգամ համազարկային կրակի ռեակտիվ համակարգերից։ Ռուսաստանը նաև օգտագործել է 4166 դրոն։
Ուկրաինայի զինված ուժերում նշել են, որ Պոկրովսկի ուղղությամբ վերջին 24 ժամում ուկրաինացի զինվորականները կանգնեցրել են ռուսական բանակի 47 հարձակում։