ԱՄՆ նախագահ Դոնալդ Թրամփը հայտարարում է, որ իր և Ռուսաստանի նախագահ Վլադիմիր Պուտինի հարաբերությունները ավելի ջերմ են դարձել, և դա զգացվում էր Անքորիջի գագաթնաժողովի ընթացքում։

Ինչպես նշել է Թրամփը, Ուկրաինայի նախագահի և եվրոպացի առաջնորդների հետ հանդիպումից հետո նա խոսել է Ռուսաստանի նախագահի հետ, սակայն ոչ հյուրերի ներկայությամբ, որոնք, Թրամփի խոսքով, Բայդենի վարչակազմից ի վեր այնքան էլ լավ հարաբերություններ չունեն Պուտինի հետ։

Թրամփի խոսքով, եվրոպացի առաջնորդների ներկայությամբ Պուտինին զանգելը «անհարգալից կլիներ Ռուսաստանի առաջնորդի նկատմամբ»։

«Հանդիպումից հետո ես պատրաստվում էի զանգահարել նախագահ Պուտինին, և նա սպասում էր այդ զանգին։ Երբ զանգահարեցի, Ռուսաստանում արդեն գիշերվա մեկի մոտ էր։ Ուշ էր, բայց նա պատասխանեց։ Նա նույնպես շատ է աշխատում, ինչպես մենք։ Շատ լավ զրույց ունեցանք։ Ես ասացի նրան, որ պատրաստվում եմ կազմակերպել հանդիպում նախագահ Զելենսկու հետ, և դուք ու նա կհանդիպեք։ Այդ հանդիպումից հետո, եթե ամեն ինչ լավ լինի, ես էլ ձեզ կհանդիպեմ ու ամփոփում կանեմ։ Նրանք պետք է որոշակի շփում ունենան, հակառակ դեպքում սա ժամանակի կորուստ կլինի։ Ես ուզում եմ այս ամենը ավարտել», – նշել է Թրամփը։