Սա հրաշալի օր է աշխարհի համար, սա հրաշալի օր է Մերձավոր Արևելքի համար, և ես պատիվ եմ համարում լինել դրա մի մասը, – ասել է Դոնալդ Թրամփը Եգիպտոսի Շարմ էլ Շեյխ քաղաքում, որտեղ նա և այլ առաջնորդներ ստորագրեցին խաղաղության համաձայնագիր։

«Մենք ստորագրում ենք մի փաստաթուղթ, որն ունի բազմաթիվ կանոններ, կարգավորումներ և համապարփակ է։ Մենք արդեն ստորագրել ենք խաղաղության համաձայնագիր Իսրայելի և Համասի միջև։ Այն աշխատում է։ Պատանդները ժամանակին ազատ են արձակվել։ Հիմա մենք աշխատում ենք զոհվածների մարմինների փոխանցման վրա։ Իսրայել-Համաս հակամարտության կարգավորմանը մասնակցել են բազմաթիվ երկրներ, որոնցից մի քանիսը ներկայացված են այստեղ։ Ես ուզում եմ շնորհակալություն հայտնել ձեզանից յուրաքանչյուրին», – ասել է նա։

Տեղեկատվության համար՝ Շարմ էլ Շեյխում հրադադարի համաձայնագրի փաստաթուղթը ստորագրել են չորս առաջնորդներ՝ ԱՄՆ նախագահ Դոնալդ Թրամփը, Եգիպտոսի նախագահ Աբդել Ֆաթթահ Ալ-Սիսին, Թուրքիայի նախագահ Ռեջեփ Թայիփ Էրդողանը և Կատարի էմիր շեյխ Թամիմ բին Համադ Ալ-Թանին։