Ուկրաինայի նախկին արտգործնախարար Դմիտրի Կուլեբան BBC-ին տված հարցազրույցում քննարկել է մոբիլիզացիոն տարիքի հնարավոր կրճատման հարցը և իր անձնական վերաբերմունքը որդուն զինվորական ծառայության զորակոչելու վերաբերյալ։

Ըստ Կուլեբայի, չնայած առկա մտահոգություններին, մոբիլիզացիոն տարիքը 25-ից 18-ի իջեցնելը քիչ հավանական է:

«Չեմ կարծում, որ այս փոփոխությունն այնքան դրամատիկ կլինի, որքան թվում է : Ես չեմ հասկանում, թե ինչու տարիքը պետք է կրճատվի անմիջապես մինչև 18 տարեկան», – ասաց Դմիտրո Կուլեբան:

Ուկրաինայի նախկին արտգործնախարարի խոսքով՝ մինչ նման որոշում կայացնելը գեներալները պետք է փաստարկներ ներկայացնեն քաղաքական ղեկավարությանը, խորհրդարանին, ամենակարեւորը՝ ուկրաինացի ժողովրդին։

«Սա չափազանց ցավոտ որոշում կլինի, որը ուկրաինական հասարակության ոչ մի հատված չի ողջունի»,- նշել է Կուլեբան։

Հարցազրույցներից մեկում Կուլեբան ասել է, որ իր 18-ամյա որդին, ով զինվորական պատրաստություն է անցնում, պատրաստ է կռվել իր երկրի համար։

«Կարծում եմ, միակ մարդը, ով ուրախ կլիներ, եթե տարիքը իջեցնեն մինչև 18, իմ որդին է, ով 18 տարեկան է»։ «Ես նրան հազիվ համոզեցի, որ ուսումը շարունակի համալսարանում»,- ասել է Ուկրաինայի նախկին արտգործնախարարը։

Հարցին, թե ինչպես կվերաբերվի որդու՝ ռազմաճակատ գնալու որոշմանը, Կուլեբան պատասխանել է. «Ես հարգում եմ նրա որոշումը : Չեմ կարծում, որ դա այն է, ինչին պետք է ձգտեք, բայց եթե ձեր ժամանակը գա, պետք է արժանապատվորեն դիմակայեք մարտահրավերին»:

Կուլեբան նշել է նաև, որ իր նպատակը երեխաներին սեփական կարծիքը պարտադրող հայր լինելը չէ։

«Նա 18 տարեկան է և կարող է որոշումներ կայացնել : Միակ բանը, որ խնդրում եմ՝ համալսարանն ավարտելն է, քանի որ առաջնագծից վերադառնալուց հետո չափազանց դժվար կլինի ուսումն ավարտելը»,- նշել է Կուլեբան։