Deutsche Welle – Եվրոպական ընկերությունների բաժնետոմսերի գները ֆոնդային բորսաներում իջել են ԱՄՆ ներմուծման մաքսատուրքերի ուժի մեջ մտնելու պատճառով
Եվրոպական ընկերությունների բաժնետոմսերի գները ֆոնդային բորսաներում իջել են ԱՄՆ ներմուծման մաքսատուրքերի ուժի մեջ մտնելու ֆոնին, հայտնում է Deutsche Welle-ն։
Ինչպես հաղորդում են լրատվամիջոցները, եվրոպական ֆոնդային ինդեքսներն օրը սկսել են նկատելի անկումով։
«STOXX Europe 600 ինդեքսը, որը հետևում է եվրոպական 600 խոշորագույն ընկերություններին, վաղ առևտրի ժամանակ ընկել է 2,95%-ով, իսկ գերմանական DAX-ը օրը սկսել է 2,92%-ով անկումով և ապրիլի 7-ից նվազել է 10%-ով:
Մինչդեռ եվրոպական դեղագործական հսկաների բաժնետոմսերի գները նույնպես նվազում են, հատկապես այն բանից հետո, երբ Դոնալդ Թրամփը հավելյալ «խոշոր» մաքսատուրքեր հայտարարեց դեղագործական ընկերությունների համար։ Գերմանական Redcare Pharmacy-ի բաժնետոմսերի արժեքը նվազել է 15,10%-ով, շվեյցարական Roche-ինը՝ 5,2%-ով, Novartis-ինը՝ 6,05%-ով, դանիական Novo Nordisk-ինը՝ 4,09%-ով:
Էներգետիկ ընկերությունների բաժնետոմսերը նույնպես նվազում են։ STXE 600 ինդեքսը, որը ներառում է գազի և նավթի արդյունաբերության ընկերությունները, վերջին չորս տարվա ընթացքում նավթի գների ռեկորդային անկման ֆոնին ընկել է 3,03%-ով։
Գերմանիայի ֆինանսների նախարար Յորգ Կուկիսի խոսքով՝ գների անկումը տեղի է ունենում «ապշեցուցիչ արագությամբ»։
ԱՄՆ նախագահ Դոնալդ Թրամփը ապրիլի 2-ից մաքսատուրքեր է սահմանել աշխարհի ավելի քան 180 երկրների վրա, որոնք ուժի մեջ են մտել այսօր՝ ապրիլի 9-ին, Եվրամիության նկատմամբ սահմանված մաքսատուրքերը կազմել են 20%։ Եվրամիությունը պատրաստվում է այսօր քվեարկել պատասխան միջոցների վերաբերյալ, որից հետո դրանք ուժի մեջ կմտնեն ապրիլի 15-ից: Ակնկալվում է, որ պատասխան մաքսատուրքերը կհարվածեն ամերիկյան գյուղատնտեսական ապրանքներին, թռչնամսի և տավարի մսին, ծովամթերքին և կաթնամթերքին, ընկույզին և շաքարավազին: