«Որոշում եմ կայացրել լքել «Լելո» կուսակցության քաղաքական խորհուրդը և գործադիր քարտուղարի պաշտոնը», – այս մասին սոցիալական ցանցում գրել է Դեա Մետրևելին։

Նրա խոսքով՝ դեպի համընդհանուր նպատակը տանող ճանապարհին, որը արդար նոր խորհրդարանական ընտրություններն ու բոլոր քաղաքական բանտարկյալների ազատումն է, ոչ նպատակահարմար է, երբ ընդդիմության մի մասը մասնակցում է ընտրություններին, իսկ մյուս մասը մնում բոյկոտի մեջ։

«Ինձ համար՝ որպես «Լելո» կուսակցության հիմնադիր, քաղաքական խորհրդի անդամ և գործադիր քարտուղար, չափազանց կարևոր էր և մնում է, որ յուրաքանչյուր որոշման մեջ մենք լինենք համազգային շարժման մի մաս։ Այս տարիների ընթացքում մեր թիմը հավատարմորեն քայլել է այդ ուղիով, քանի որ ռեժիմի դեմ պայքարի միակ արդյունավետ ճանապարհը միասնությունն է։

Ցավալի է, որ այսպես կոչված տեղական ընտրությունների շուրջ չհաջողվեց հասարակության և ընդդիմադիր կուսակցությունների միավորումը ընդհանուր ծրագրի շուրջ։ Հետևաբար, դեպի համընդհանուր նպատակը տանող ճանապարհին, որը նոր արդար խորհրդարանական ընտրություններն են և քաղաքական բանտարկյալների ազատումը, նպատակահարմար չեմ համարում, որ ընդդիմադիր ուժերի մի մասը մասնակցի ընտրություններին, իսկ մյուս մասը մնա բոյկոտում։

Կարծում եմ, որ «Ուժեղ Վրաստանի» կողմից այսօր հրապարակված որոշումը, հաշվի առնելով ստեղծված իրավիճակը, հետևողական քայլ չէ մեր ընդհանուր պայքարի համար, առավել ևս՝ Մամուկա Խազարաձեի և Բադրի Ջափարիձեի բացառիկ սկզբունքային և արժանապատիվ քայլի ֆոնին՝ ազատազրկման գնով մնալ հավատարմորեն ընդհանուր պայքարին։

Հետևաբար, որոշում եմ կայացրել լքել կուսակցության քաղաքական խորհուրդը և գործադիր քարտուղարի պաշտոնը։ Միևնույն ժամանակ, մնում եմ այն համընդհանուր պայքարում, որն առնչվում է բոլորիս՝ Վրաստանի ազատագրումը և նրա եվրոպական ապագան։ Ազատություն բոլոր քաղաքական բանտարկյալներին։ Պայքարը շարունակվելու է մինչև հաղթանակ», – գրել է Դեա Մետրևելին։

Հիշեցնենք, որ այսօր հայտնի դարձավ՝ «Լելո – Ուժեղ Վրաստան» կոալիցիան մասնակցելու է տեղական ինքնակառավարման ընտրություններին։

«Լելո»-ի Թբիլիսիի կազմակերպության ղեկավարի և քաղաքական խորհրդի անդամի պաշտոնը լքել է նաև Սաբա Բուաձեն։