5G ցանցերի անվտանգության հուշագրի ստորագրումը ռազմավարական գործընկերության մեկ այլ արտահայտություն է, որը մեզ կապում է Միացյալ Նահանգների հետ, – այս մասին հայտարարել է Վրաստանի արտաքին գործերի նախարար Դավիթ Զալկալիանին:

Ըստ Զալկալիանիի, ԱՄՆ-ի եւ Վրաստանի միջեւ 5G ցանցի անվտանգության հուշագրի հաջող իրականացումը զգալիորեն կբարձրացնի ամերիկյան ընկերությունների հետաքրքրությունը Վրաստանի նկատմամբ:

«Բոլորը քաջ գիտակցում են, որ քաղաքական մակարդակով մենք գտնվում ենք համագործակցության ամենաբարձր նշանակետի վրա, ինչպես նաեւ պաշտպանության ու անվտանգության ոլորտում: Մեր հավակնությունն է հավասարեցնել առևտրատնտեսական համագործակցության մակարդակը քաղաքականության, պաշտպանության և անվտանգության ոլորտների հետ:

5G հուշագրի ստորագրումը և դրա հաջող իրականացումը կծառայեն այս նպատակին և էապես կբարձրացնեն ամերիկյան ընկերությունների հետաքրքրությունը Վրաստանի նկատմամբ: Միևնույն ժամանակ, նոր ժամանակակից տեխնոլոգիաների ներդրումը կնպաստի Վրաստանի կայուն տնտեսական զարգացմանը, ինչը հատկապես կարևոր է նույնիսկ համաշխարհային համաճարակի առաջ բերած նոր մարտահրավերների ֆոնին:

Այս հուշագրի ընդլայնմամբ Վրաստանը միացավ ՆԱՏՕ-ի ու ԵՄ-ի մեր գործընկերների համատեղ նախաձեռնությանը «Մաքուր ցանցերի վերաբերյալ, որոնք կապահովեն Վրաստանի ապագա սերնդի ինտերնետային հուսալի էկոհամակարգի, թվային ծառայությունների և ընդհանուր թվային տնտեսության զարգացումը՝ միջազգային չափանիշներին համապատասխան», – ասաց Զալկալիանին:

Նախարարի մեկնաբանությունը տարածում է արտաքին գործերի նախարարության մամուլի ծառայությունը:

Երեկ Վրաստանում ԱՄՆ դեսպանատունը հրապարակեց ԱՄՆ-ի եւ Վրաստանի կառավարությունների միջեւ փոխըմբռնման հուշագրի տեքստը: