Թբիլիսիի քաղաքային դատարանը «Լելո» շարժման առաջնորդներից մեկին՝ Բադրի Ջափարիձեին, դատապարտեց ութ ամսվա ազատազրկման՝ խորհրդարանի ժամանակավոր քննչական հանձնաժողովի պահանջը չկատարելու համար։ Նրան նաև երկու տարով արգելվեց պաշտոնավարել։

Որոշումը քիչ առաջ հրապարակեց Թբիլիսիի քաղաքային դատարանի դատավորը։ Ջափարիձեն չէր ներկայացել նիստին։

Բադրի Ջափարիձեն մարտի 25-ին կանչվել էր Վրաստանի խորհրդարանի ժամանակավոր քննչական հանձնաժողովի նիստ՝ բացատրություն տալու համար, որտեղ նա չէր ներկայացել։ Նրան մեղադրանք է առաջադրվել Քրեական օրենսգրքի 349-րդ հոդվածով, որը վերաբերում է «Վրաստանի խորհրդարանի ժամանակավոր քննչական հանձնաժողովի պահանջը չկատարելուն»։

Թբիլիսիի քաղաքային դատարանը ապրիլի 5-ին Բադրի Ջափարիձեի նկատմամբ որպես խափանման միջոց սահմանեց 50,000 լարի գրավ, որը նա վճարեց օրենքով սահմանված ժամկետում։

Բացի այդ, այսօր հրապարակվեց նաև «Լելո» շարժման առաջնորդ Մամուկա Խազարաձեի դատավճիռը։ Դատարանը նաև Խազարաձեին դատապարտեց ութ ամսվա ազատազրկման և երկու տարով արգելեց նրան պաշտոն զբաղեցնել։