«CNN»-ի փոխանցմամբ՝ Սթիվ Ուիթքոֆը մեկնել է Շվեյցարիա՝ Իրանի հետ վերջնական խաղաղության համաձայնագրի մանրամասների շուրջ բանակցություններ վարելու համար
Լրատվամիջոցների հաղորդմամբ՝ ԱՄՆ նախագահի հատուկ ներկայացուցիչ Սթիվ Ուիթքոֆը մեկնել է Շվեյցարիա, որպեսզի Իրանի հետ բանակցություններ վարի խաղաղության վերջնական համաձայնագրի մանրամասների շուրջ։ Այս մասին գրում է «Սի-Էն-Էն»-ը՝ հղում անելով ամերիկացի բարձրաստիճան պաշտոնյային։
Աղբյուրի տեղեկություններով՝ Ուիթքոֆն արդեն ճանապարհին է դեպի Շվեյցարիա, որտեղ ԱՄՆ-ի և Իրանի միջև տեղի կունենա բանակցությունների նոր փուլ՝ խաղաղության վերջնական համաձայնագրի մանրամասները հստակեցնելու համար։
Համաձայնագրի հիմք է հանդիսացել ավելի վաղ ստորագրված փոխըմբռնման հուշագիրը։
Բանակցություններին Ուիթքոֆին կմիանա նաև Դոնալդ Թրամփի փեսան՝ Ջարեդ Քուշները։ Այս պահին հայտնի չէ, թե կոնկրետ երբ կկայանան հանդիպումները։
Ավելի վաղ տեղեկություն էր տարածվել, որ ԱՄՆ-ի և Իրանի միջև առաջին «տեխնիկական» բանակցությունները, որոնք պետք է կայանային հունիսի 19-ին Շվեյցարիայում, վերջին պահին չեղարկվել էին։ Որպես հնարավոր պատճառ նշվում է Իսրայելի և Իրանի կողմից աջակցվող լիբանանյան «Հեզբոլլահ» խմբավորման միջև նոր հակամարտությունը։
Ինչպես հայտնի է, հունիսի 17-ին ԱՄՆ-ն և Իրանը հեռավար կարգով ստորագրել են հուշագիր պատերազմի դադարեցման և Հորմուզի նեղուցի բացման մասին։ Այս փաստաթուղթը հիմք է հանդիսանում վերջնական համաձայնագրի մշակման համար, որով առաջիկա 60 օրվա ընթացքում պետք է ամրագրվի հրադադարը և խաղաղության համաձայնագրի պայմանները։