Բուլղարիայում ընթանում են խորհրդարանական ընտրություններ
Բուլղարիայում ընթանում են խորհրդարանական ընտրություններ: Բուլղարիան վերջին չորս տարվա ընթացքում յոթերորդ անգամ է ընտրում իր խորհրդարանը։ Ընտրություններին մասնակցում է 19 կուսակցություն, ինը կոալիցիա և մեկ անկախ թեկնածու։
Բուլղարիայի նախագահ Ռումեն Ռադևը արտահերթ ընտրություններ է նշանակել այն բանից հետո, երբ քաղաքական կուսակցությունները չկարողացան համաձայնության գալ կառավարական կոալիցիայի ձևավորման շուրջ։
Ընտրատեղամասերը բացվել են այսօր տեղական ժամանակով ժամը 07:00-ին և կփակվեն 20:00-ին, թեև հերթագրված ընտրողների դեպքում այն կարող է երկարաձգվել մինչև 21:00-ն:
Քաղաքացիական կացության ակտերի գրանցման և վարչական ծառայությունների ծառայության պաշտոնական տվյալների համաձայն՝ ընտրելու իրավունք ունի Բուլղարիայի ավելի քան 6,6 միլիոն քաղաքացի։
Բուլղարիայում բացվել է 12879 ընտրատեղամաս, իսկ արտերկրում՝ 719։
Բուլղարիայում քաղաքական ճգնաժամը շարունակվում է 2021 թվականից, դրանից հետո երկրում անցկացվել են վեց արտահերթ խորհրդարանական ընտրություններ։ Վերջին ընտրություններն անցկացվել են 2024 թվականի հունիսին, սակայն կառավարության ձևավորումը ձախողվել է։