Բրազիլիայում ուժեղ անձրևների պատճառով առնվազն վեց մարդ է մահացել, հազարավորները տարհանվել են
Բրազիլիայում տեղացած ուժեղ անձրևների հետևանքով զոհվել է առնվազն վեց մարդ, իսկ հազարավոր մարդիկ ստիպված են եղել տարհանվել, հաղորդում է Ռոյթերսը։
Վերջին 48 ժամվա ընթացքում Բրազիլիայի հյուսիս-արևելյան շրջանում ուժեղ անձրևները ջրհեղեղներ և սողանքներ են առաջացրել։
Հատկապես տուժել են Պերնամբուկո և Պարաիբա նահանգները։
Պերնամբուկոյում ուժեղ անձրևները ջրհեղեղներ և սողանքներ են առաջացրել նահանգի մայրաքաղաք Ռեսիֆեում և հարակից տարածքներում։
Պաշտոնական տվյալների համաձայն՝ Ռեսիֆեում մահացել է երկու մարդ, մոտակա Օլինդա քաղաքում՝ երկուսը, և մոտ 1500 մարդ մնացել է անօթևան։ Պարաիբայում մահացել է երկու մարդ, և աղետից տուժել է մոտ 1800 մարդ։
Բրազիլիայի կառավարության տվյալներով՝ տարածաշրջանում հայտարարվել է արտակարգ իրավիճակների պատրաստվածության ամենաբարձր մակարդակը։ Իշխանությունները կոչ են անում բնակչությանը զգույշ լինել։