Bloomberg.Քեյր Սթարմերն այսօր Լոնդոնում կհանդիպի Վլադիմիր Զելենսկիի հետ՝ Ուկրաինան հնարավոր ռուսական ագրեսիայից պաշտպանելու ծրագիր մշակելու համար
Մեծ Բրիտանիայի վարչապետ Քիր Սթարմերը այսօր Լոնդոնում կհանդիպի Ուկրաինայի նախագահ Վլադիմիր Զելենսկու հետ՝ խաղաղ բանակցությունների վճռորոշ փուլում, որպեսզի մշակեն ծրագիր, որը կպաշտպանի Ուկրաինան Ռուսաստանի հնարավոր ագրեսիայից։
Bloomberg-ի տվյալներով՝ Դաունինգ սթրիթում կայանալիք բանակցություններին կմիանան նաև Ֆրանսիայի նախագահ Էմանուել Մակրոնը և Գերմանիայի կանցլեր Ֆրիդրիխ Մերցը։
Ինչպես գրում է Bloomberg-ը, Ուկրաինայի եվրոպացի աջակիցները հույս ունեն, որ եթե այս ձմեռ կարողանան շարունակել Կիևի աջակցությունը, ապա Ռուսաստանի տնտեսական դժվարությունները 2026-ին կխորանան, և Պուտինը կկորցնի մանևրելու լծակները խաղաղ բանակցություններում։
Բացի այդ, հրապարակման մեջ նշվում է, որ կիրակի օրը Սթարմերը զրուցել է Նիդեռլանդների վարչապետ Դիկ Շուֆի հետ։ Զրույցի ընթացքում կողմերը համաձայնել են, որ անհրաժեշտ է շարունակել միջազգային աջակցությունը Ուկրաինայի պաշտպանության համար և կրկին ընդգծել են, որ Ուկրաինայի անվտանգությունը կենսական նշանակություն ունի Եվրոպայի անվտանգության համար։
Մեդիայի հաղորդմամբ՝ ուկրաինացիներն ու նրանց եվրոպացի դաշնակիցները մտահոգված են այն փաստով, որ ԱՄՆ-ն չի նախատեսում Եվրոպայի ներգրավումը խաղաղ բանակցություններում։ Սա Ուկրաինային և Եվրոպային մղում է այն եզրակացության, որ Վաշինգտոնը անտեսել է նոյեմբերի 23-ին Ժնևում կայացած բանակցությունների արդյունքները՝ եվրոպացիների, ամերիկացիների և ուկրաինացիների մասնակցությամբ, որոնք նպատակ ունեին «խաղաղության պլանը» համահունչ դարձնել միջազգային իրավունքին և հանել դրանից առավել խնդրահարույց կետերը։