Բելառուսի Գերագույն դատարանը որոշել է դադարեցնել Բելառուսի ժողովրդական ճակատ կուսակցության լիազորությունները
Բելառուսի Գերագույն դատարանը որոշել է դադարեցնել Բելառուսի ժողովրդական ճակատ կուսակցության լիազորությունները, որը ժամանակակից Բելառուսի ամենահին քաղաքական միավորումն է։ Այս մասին գրում է բելառուսական «Զերկալո» հրատարակությունը։
«Բելառուսի ժողովրդական ճակատի» լիազորությունները դադարեցնելու վերաբերյալ հայցը ներկայացրել է Բելառուսի արդարադատության նախարարությունը՝ քաղաքական ուժի կողմից վերագրանցման համար փաստաթղթեր չներկայացնելու պատճառով։
2023 թվականի փետրվարին Բելառուսում ուժի մեջ է մտել քաղաքական կուսակցությունների մասին նոր օրենքը, որը պահանջում է կուսակցությունների պարտադիր վերագրանցում օրենքն ուժի մեջ մտնելուց հետո վեց ամսվա ընթացքում։
Ինչպես գրում է «Զերկալո» հրատարակությունը, բռնաճնշումների պայմաններում ընդդիմադիր ուժերը չեն կարող կատարել վերագրանցման պահանջները, մասնավորապես՝ հավաքված ստորագրությունների քանակի և մասնաճյուղերի բացման առումով։ Հետևաբար, միայն Լուկաշենկոյի ռեժիմին սատարող երեք կուսակցություններն են կարողացել ավարտին հասցնել գործընթացները։
«Բելառուսի ժողովրդական ճակատ»-ը Բելառուսի ամենահին կուսակցություններից է, որը հիմնադրվել է 1993 թվականին։
Միևնույն ժամանակ, «Բելառուսի ժողովրդական ճակատը» իր արմատներն ունի համանուն հասարակական միավորման մեջ, որն իր գոյությունը սկսել է 1980-ականների վերջին։