Վրաստանի Ներքին գործերի նախարարության կենտրոնական քրեական ոստիկանության դեպարտամենտի Աջարայի գլխավոր վարչության աշխատակիցները Բաթումում ձերբակալել են երկու անձի՝ 1994 թվականին ծնված, նախկինում դատված Գ.Խ.-ին և Ղազախստանի Հանրապետության 1985 թվականին ծնված քաղաքացի Ա.Վ.-ին, մեծ քանակությամբ թմրանյութերի ապօրինի ձեռք բերման, պահման և իրացման աջակցման մեղադրանքով։ Այս մասին տեղեկություն է տարածել ՆԳՆ-ն։

Նախարարության հաղորդմամբ՝ Գ.Խ.-ի անձնական և բնակարանի խուզարկությամբ նյութական ապացույցների տեսքով հայտնաբերվել է վաճառքի համար պատրաստված 10.47 գրամ մեթադոն և 40 գրամ չորացված մարիխուանա, ինչպես նաև թմրանյութերի փաթեթավորման համար անհրաժեշտ պարագաներ՝ սոսնձող ժապավեններ և էլեկտրոնային կշեռք։

«Բացի այդ, Գ.Խ.-ի բացատրությամբ՝ նրան վաճառքի նպատակով մեթադոն է մատակարարել Ղազախստանի քաղաքացի Ա.Վ.-ն։ Վերջինիս բնակարանի խուզարկությամբ նույնպես հայտնաբերվել է 43 գրամ մեթադոն», – նշված է ՆԳՆ հաղորդագրությունում։

Ոստիկանությունը երկու անձին ձերբակալել է որպես մեղադրյալներ, և նրանց նկատմամբ գործը քննվում է Վրաստանի քրեական օրենսգրքի 260-րդ և 260-ე^1 (քվարտա) հոդվածներով։

Նշված հանցագործությունները պատժվում են մինչև 20 տարվա կամ անժամկետ ազատազրկմամբ։