Բաշար Ասադն ասում է, որ Ռեջեփ Թայիփ Էրդողանի հետ կհանդիպի միայն այն դեպքում, եթե հանդիպմանը քննարկվեն հիմնական հարցերը
Սիրիայի նախագահ Բաշար Ասադը Թուրքիայի նախագահ Ռեջեփ Թայիփ Էրդողանի հետ կհանդիպի միայն այն դեպքում, եթե այս հանդիպմանը քննարկվեն հիմնական հարցերը։ Այս մասին հայտարարել է Սիրիայի նախագահը։ Տեղեկությունը տարածում է Ռոյթերսը։
Ասադն ասել է, որ կհանդիպի Էրդողանի հետ, եթե երկու երկրներն էլ կենտրոնանան «ահաբեկչությանը Անկարայի աջակցության» և Սիրիայի տարածքից թուրքական ուժերի դուրս բերման վրա։
«Խնդիրը հանդիպումը չէ, այլ դրա բովանդակությունը։ Ո՞րն է հանդիպման նպատակը։ Արդյո՞ք դրանով կվերջանան խնդրի արմատական պատճառները, որոնք են՝ աջակցությունն ահաբեկչությանը և թուրքական ուժերի դուրսբերումը Սիրիայից: Սա է խնդրի էությունը: Եթե հիմնական խնդրի քննարկում չլինի, ապա ի՞նչ իմաստ կունենա նման հանդիպումը»,- ասել է Ասադը։
Սիրիայի նախագահի խոսքով՝ ինքը դրականորեն կպատասխանի երկկողմ հարաբերությունների բարելավմանն ուղղված ցանկացած նախաձեռնության, սակայն, ըստ նրա, նախ պետք է հիմք ստեղծվի նման բանակցությունների համար։