«Միացյալ ազգային շարժման» նախագահ Թինա Բոկուչավան և կուսակցության քաղաքական քարտուղար Գիորգի Բարամիձեն հանդիպել են Մոլդովայի նախագահ Մայա Սանդուի, փոխվարչապետի և արտաքին գործերի նախարար Միհայ Պոպշոյի հետ։ Այս մասին տեղեկացնում է կուսակցության մամուլի ծառայությունը։

Հանդիպումից հետո Բոկուչավան նշել է, որ Մոլդովայի Անկախության օրվա առթիվ «Վայմարի եռանկյունու» առաջնորդների այցը Կիշինև վկայում է, որ ԵՄ-ն լուրջ ջանքեր է գործադրում Մոլդովայի եվրոպական ինտեգրման ուղղությամբ։

Նրա խոսքով՝ Եվրոպայում սպասում են նաև վրաց ժողովրդին, և անհրաժեշտ է կրկնապատկել ջանքերը արտաքին ճակատում, որպեսզի Վրաստանը չհեռացվի միջազգային օրակարգից։

«Այսօր մենք հանդիպեցինք Մոլդովայի նախագահ Մայա Սանդուին և արտգործնախարարին՝ այն պատմական իրադարձությունից հետո, երբ Մոլդովայի Անկախության օրվա կապակցությամբ և նրա եվրաինտեգրացիային աջակցելու նպատակով Կիշինևում էին «Վայմարի եռանկյունու» երեք առաջնորդները՝ Էմանուել Մակրոնը, Դոնալդ Տուսկը և Ֆրիդրիխ Մերցը։ Սա հաստատում է, որ ԵՄ-ն անում է ամեն ինչ, որպեսզի Մոլդովան դառնա եվրոպական ընտանիքի լիիրավ անդամ, ինչը խաղաղության, ազատության և բարեկեցության երաշխիքն է։ Այս հնարավորությունից մեզ զրկում է Իվանիշվիլու քրեական խումբը, այն դեպքում, երբ Եվրոպայում սպասում են մեզ՝ վրաց ժողովրդին։ Այս հնարավորությունը դրված է մեր ձեռքերում, ուստի պարտադիր է կրկնապատկել ջանքերը արտաքին ճակատում՝ Վրաստանը միջազգային օրակարգում պահելու և երկրի ներսում այս գործընթացները համաժամեցնելու միջոցով ռեժիմի փոփոխություն իրականացնելու և Վրաստանին եվրոպական ինտեգրման ճանապարհ վերադարձնելու համար», – հայտարարել է Թինա Բոկուչավան։