Թելավիում, Էրեկլե երկրորդի պալատում այսօր տեղի է ունենալու նորընտիր նախագահ Սալոմե Զուրաբիշվիլիի երդմնակալության արարողությունը: Միջոցառումը սկսվելու է ժամը 15:00-ին, իսկ թագավորի պալատում հյուրերին սպասում են ժամը 13:00-ից: Երդմնակալության արարողությունը տևելու է 40 րոպե:

Վրաստանի հինգերրորդ նախագահի երդմնակալության արարողությանը ներկա են գտնվելու 55 երկրի մոտ 150 ներկայացուցիչներ, այդ թվում Հայաստանի հանրապետության նախագահ Արմեն Սարգսյանը, Ֆրանսիայի նախկին նախագահ (2007- 2012 թթ..) Նիկոլա Սարկոզին, Թուրքիայի հանրապետության փոխնախագահը, Ադրբեջանի խորհրդարանի խոսնակը և այլ պատվավոր հյուրեր:

Երդմնակալության սցենարի համաձայն, ժամը 15:00-ին բանակը բերվելու է պատրաստության, քայլով երթ են անելու զինվորական ստորաբաժանումների դրոշակիրները, որից հետո դուրս են գալու գործող նախագահ Գիորգի Մարգվելաշվիլին և Սալոմե Զուրաբիշվիլին: Տեղի է ունենալու երդմնակալության արարողությունը: Սահմանադրական դատարանի նախագահը սահմանադրությունը դնելու է աստվածաշնչի վրա, նախագահը երդում է տալու աստվածաշնչի և սահմանադրության վրա:

Երդմնակալությունից հետո ուժի մեջ է մտնելու նոր սահմանադրությունը:

Երդմնակալության արարողության ժամանակ անհրաժեշտ ատրիբուտներն են՝ Վրաստանի օրհներգը, դրոշը և թնդանոցից կրակելը: Միջոցառմանը երաժշտական ձևավորման համար հոգալու է ռազմական ցուցադրական օրկեստրը: Վրացական պոլիֆոնիայի լավագույն կատարողներից միավորված համույթները կատարելու են Վրաստանի օրհներգը և այլ գործեր:

Զինվորական ստորաբաժանումների հրամանատարները դիմելու են արդեն նորընտիր գլխավոր հրամանատարին:

Սալոմե Զուրաբիշվիլին թվով հինգերրորդ և առաջին կին նախագահն է:

Սալոմե Զուրաբիշվիլիի կենսագրական տվյալները.

Սալոմե Զուրաբիշվիլին ծնվել է 1952 թվականի մարտի 18-ին Փարիզում, Ֆրանսիա:

Կրթությունը.

1969-1972 թթ.. Քաղաքական գիտությունների ինստիտուտ – Փարիզ, Ֆրանսիա

1972-1973 թթ.. Կոլումբիայի համալսարան, միջազգային և հասարակական գործերի դպրոց – Նյու Յորք, Ամերիկայի Միացյալ Նահանգներ

Լեզուներ.

Վրացերեն, Ֆրանսերեն, Անգլերեն (ազատ), իտալերեն (խոսակցական)

Քաղաքական կարիերան Վրաստանում.

2016 -2018 թթ.. Վրաստանի խորհրդարանի անկախ պատգամավոր – Մթածմինդայի շրջանից

2006 – 2010 թթ.. «Վրաստանի ճանապարհ» քաղաքական կուսակցության լիդեր

2004-2005 թթ.. Վրաստանի արտաքին գործերի նախարար

Այլ գործառույթներ.

2010-2015 թթ.. Միավորված ազգերի կազմակերպություն – ՄԱԿ-ի անվտանգության խորհրդի Իրանի դեմ պատժամիջոցների մոնիտորինգի խմբի ղեկավար

Ասոցացված պրոֆեսոր Փարիզի քաղաքական գիտությունների ինստիտուտում

Վրաստանի նախագահ Սալոմե Զուրաբիշվիլին երդմնակալությունից հետո աշխատանքը շարունակելու է Թբիլիսիում, Աթոնելիի փողոցում գտնվող Օրբելիանիների նստավայրում: