Axios-ի թղթակից Բարակ Ռավիդը, ով առաջիններից էր, ով գրեց ԱՄՆ-ի նոր խաղաղության ծրագրի մասին, սոցիալական ցանց X-ում հրապարակել է Վաշինգտոնի կողմից Ուկրաինային առաջարկված անվտանգության երաշխիքների նախագծի ամբողջական տեքստը։

Տեքստի համաձայն՝ ԱՄՆ-ը Ուկրաինային առաջարկում է ՆԱՏՕ-ի կանոնադրության 5-րդ հոդվածին համարժեք անվտանգության երաշխիքներ։ Այդպիսի երաշխիքներ Ուկրաինան կստանա այն դեպքում, եթե համաձայնի այն զիջումներին, որոնք ամերիկյան ծրագրում ներկայացված են։

Հաղորդվում է, որ անվտանգության երաշխիքների վերաբերյալ փաստաթուղթը պետք է ստորագրեն Ուկրաինան, Ռուսաստանը, ԱՄՆ-ը, Եվրամիությունը և ՆԱՏՕ-ն։

Տեքստում նշվում է․
«ԱՄՆ-ի առաջարկի ամբողջական տեքստը – Ուկրաինայի անվտանգության երաշխիքների նախագիծ. Սույն շրջանակային համաձայնագիրը սահմանում է հրադադարի պայմանները Ուկրաինայի և Ռուսաստանի Դաշնության միջև և հաստատում անվտանգության երաշխիքներ, որոնք հիմնված են Հյուսիսատլանտյան պայմանագրի հինգերորդ հոդվածի սկզբունքների վրա, հարմարեցված այս հակամարտության հանգամանքներին և Միացյալ Նահանգների ու նրանց եվրոպացի գործընկերների շահերին։

Միացյալ Նահանգները հաստատում է, որ Ռուսաստանի Դաշնության էական, կանխամտածված և երկարատև զինված հարձակումն, համաձայնեցված պայմանագրով սահմանված շփման գիծը հատելու միջոցով Ուկրաինայի տարածքում, կհամարվի հարձակում, որը սպառնում է տրանսատլանտյան համայնքի խաղաղությանն ու անվտանգությանն։

Այդ դեպքում, ԱՄՆ նախագահը, իր սահմանադրական լիազորությունների շրջանակում և Ուկրաինայի, ՆԱՏՕ-ի և եվրոպացի գործընկերների հետ անհապաղ խորհրդակցություններից հետո, կսահմանի այն միջոցները, որոնք անհրաժեշտ կլինեն անվտանգության վերականգնման համար։ Այդ միջոցները կարող են ներառել զինված ուժի կիրառում, հետախուզական և լոգիստիկ աջակցություն, տնտեսական և դիվանագիտական քայլեր, ինչպես նաև այլ անհրաժեշտ գործողություններ։

ՆԱՏՕ-ի և Ուկրաինայի մասնակցությամբ կգործի համատեղ գնահատման մեխանիզմ, որը կուսումնասիրի հնարավոր խախտումները։ ՆԱՏՕ-ի անդամ երկրները, այդ թվում՝ Ֆրանսիան, Մեծ Բրիտանիան, Գերմանիան, Լեհաստանը և Ֆինլանդիան, հաստատում են, որ Ուկրաինայի անվտանգությունը եվրոպական կայունության անբաժանելի մասն է և պարտավորվում են Միացյալ Նահանգների հետ միասին գործել համապատասխան խախտման պարագայում՝ ապահովելու համատեղ, վստահելի զսպման դիրք։

Սույն շրջանակային համաձայնագիրը կմտնի ուժի մեջ ստորագրման պահից և գործելու է տասը տարի ժամկետով՝ հնարավոր երկարաձգմամբ ընդհանուր համաձայնությամբ։ Նրա իրականացման մոնիտորինգը կիրականացնի համատեղ վերահսկող հանձնաժողովը, որը կգործի եվրոպացի գործընկերների ղեկավարությամբ և ԱՄՆ-ի մասնակցությամբ»։