Մարդու իրավունքները Վրաստանում ավելի ու ավելի են սպառնալիքի տակ, և ընդդիմության ձայների ու քաղաքացիական հասարակության վրա ճնշումը մեծանում է, ասել է Ավստրիայի արտաքին գործերի նախարար Բեատե Մայնլ-Ռեյզինգերը։

Նրա խոսքով՝ Վրաստանում տեղի ունեցող իրադարձությունները քննարկվել են նաև Բրյուսելում կայացած արտաքին գործերի նախարարների խորհրդում։

«Ես ևս մեկ անգամ ընդգծեցի, որ Վրաստանի կառավարությունը պետք է կառուցողական երկխոսություն վարի քաղաքացիական հասարակության հետ և երաշխավորի խոսքի և հավաքների ազատությունը։ Ընդդիմության առաջնորդների ձերբակալությամբ այլախոհությունը ճնշելը անընդունելի է։ Մենք ցանկանում ենք աջակցել Վրաստանին իր եվրոպական ճանապարհին։ Մենք հսկայական ներուժ ենք տեսնում ազատության և բարգավաճման ընդհանուր տարածքում։ Վրաստանի կառավարությունը պետք է ճանապարհ հարթի իր քաղաքացիների համար, այլ ոչ թե կանգնի նրանց ճանապարհին», – ասել է նախարարը։