Վրաստանի արտաքին գործերի նախարար Դավիթ Զալկալիանիի խոսքով, մարտի 16-ին Բրյուսելում կայանալիք ասոցացման խորհրդի նիստում քննարկվելու են Վրաստանի և Եվրամիության միջև գոյություն ունեցող օրակարգի բոլոր հիմնական ուղղությունները:

«Ինչպես կառավարության նիստում հայտարարել է վարչապետը, մարտի 16-ին Բրյուսելում տեղի կունենա Եվրամիություն-Վրաստան ասոցացման խորհրդի նիստը: Սա Վրաստանի և Եվրամիության բարձրագույն համագործակցության ձևաչափն է, որտեղ Վրաստանի պատվիրակությունը կգլխավորի երկրի վարչապետը: Քննարկվելու են Վրաստանի և Եվրամիության միջև օրակարգի բոլոր հիմնական ուղղությունները:

Ինչպես գիտեք, խորհուրդը քննարկում է այնպիսի կարևոր հարցեր, ինչպիսին է ասոցացման համաձայնագրի իրագործումը, ինչպես նաև Եվրամիության հետ մեր քաղաքական համագործակցության բոլոր հիմնական ոլորտները: Ասոցացման համաձայնագրի բոլոր հարցերը ամբողջությամբ փակ են լինելու», – ասել է Զալկալիանին:

Ըստ Զալկալիանիի, բանակցությունները հիմնականում քննարկելու են բռնազավթված տարածքներում առկա մարտահրավերները, տարածաշրջանում աշխարհաքաղաքական գործընթացները, Վրաստանի ներկայիս քաղաքական իրավիճակը և այլ հարցեր:

«Իհարկե, մենք կխոսենք անվտանգության իրավիճակի, բռնազավթված տարածքներում առկա մարտահրավերների, տարածաշրջանում աշխարհաքաղաքական գործընթացների, համավարակի դեմ պայքարի, Եվրամիության  ֆինանսական աջակցության խնդիրների և, իհարկե, երկրում առկա քաղաքական գործընթացների մասին:

Դա մեզ համար մեկ այլ հնարավորություն կլինի հավասարեցնել մեր քաղաքականությունը Եվրամիության հետ, նշել այն առաջընթացը, որը երկիրը գրանցել է տնտեսական, քաղաքական և ժողովրդավարական բարեփոխումների իրականացման գործում, ինչպես նաև քննարկել ապագա հեռանկարները և այն, ինչ պետք է արվի Վրաստանի Եվրամիությանը ինտեգրման ուղղությամբ», – ասել է Դավիթ Զալկալիանին: