2025 թվականի ապրիլի 30-ին Եվրոպայի խորհրդի Նախարարների կոմիտեն ընդունեց իր տասներկուերորդ որոշումը՝ «Եվրոպայի խորհուրդը և հակամարտությունը Վրաստանում» օրակարգային հարցի շրջանակներում, ասվում է Վրաստանի արտաքին գործերի նախարարության հայտարարության մեջ։

Հայտարարության համաձայն՝ Եվրոպայի խորհուրդը և նրա 46 անդամ պետությունները վերահաստատում են իրենց անսասան աջակցությունը Վրաստանի ինքնիշխանությանը և տարածքային ամբողջականությանը միջազգայնորեն ճանաչված սահմանների շրջանակներում։

«Որոշման մեջ նշվում է, որ Ռուսաստանի Դաշնությունը խախտում է իր միջազգային պարտավորությունները, այդ թվում՝ Եվրամիության միջնորդությամբ ստորագրված 2008 թվականի օգոստոսի 12-ի հրադադարի մասին համաձայնագիրը և շարունակում է իր անօրինական ռազմական ներկայությունը Վրաստանի Աբխազիայի և Ցխինվալիի շրջաններում։ Նախարարների կոմիտեի որոշման մեջ անդամ պետությունները կրկին ողջունում են Եվրոպայի խորհրդի 2023 թվականի Ռեյկյավիկի պատմական գագաթնաժողովի հռչակագիրը, որում կազմակերպության անդամ պետությունների ղեկավարները կոչ են արել Ռուսաստանին կատարել իր միջազգային պարտավորությունները և անհապաղ, ամբողջությամբ և անվերապահորեն դուրս բերել իր ուժերը Վրաստանի տարածքից։ Եվրոպայի խորհրդի անդամ պետությունները ողջունում են Մարդու իրավունքների եվրոպական դատարանի որոշումները, որոնք սահմանել են Ռուսաստանի Դաշնության պատասխանատվությունը Վրաստանի Աբխազիայի և Ցխինվալիի շրջանների օկուպացիայի ընթացքում մարդու իրավունքների կոպիտ խախտումների համար և հաստատել են Ռուսաստանի Դաշնության արդյունավետ վերահսկողությունը օկուպացված Աբխազիայի նկատմամբ՝ մինչև 2008 թվականի օգոստոսյան ռուս-վրացական պատերազմը։

Փաստաթղթում նաև ողջունվում է Ստրասբուրգի դատարանի 2024 թվականի դեկտեմբերի 17-ի վերջերս կայացված որոշումը, որով Դատարանը կրկին ճանաչել է Ռուսաստանի պատասխանատվությունը մարդու իրավունքների, այդ թվում՝ սեփականության իրավունքի խախտումների համար։ Եվրոպայի խորհրդի Նախարարների կոմիտեն կոչ է անում Ռուսաստանի Դաշնությանը կատարել Մարդու իրավունքների եվրոպական դատարանի որոշումները և ապահովել Եվրոպայի խորհրդի մարդու իրավունքների պաշտպանության և մոնիթորինգի մարմինների անհապաղ, անսահմանափակ մուտքը Վրաստանի կառավարության վերահսկողությունից դուրս մնացած տարածքներ։

Հատկանշական է, որ Նախարարների կոմիտեի որոշումների կայացման գործընթացը տեղի է ունենում 2014 թվականից։ «Սրանով Եվրոպայի խորհուրդը հստակորեն ընդգծում է Ռուսաստանի Դաշնության կողմից վրացական շրջանների օկուպացիայի հարցի առաջնահերթությունը կազմակերպության քաղաքական օրակարգում և ներկայացնում է կարևոր իրավաքաղաքական փաստաթուղթ, որը արտացոլում է Եվրոպայի խորհրդի 46 անդամ պետությունների հստակ դիրքորոշումը», – ասվում է Վրաստանի արտաքին գործերի նախարարության հայտարարության մեջ։