Արդարադատության նախարարություն. Վրաստանը միակն է տարածաշրջանում և ԵՄ անդամության թեկնածու պետությունների շարքում, որը թրաֆիքինգի դեմ պայքարի ուղղությամբ զբաղեցնում է Պետդեպարտամենտի գնահատման բարձրագույն նիշը
ԱՄՆ պետդեպարտամենտը հրապարակել է թրաֆիքինգի վերաբերյալ 26-րդ ամենամյա զեկույցը, համաձայն որի՝ թրաֆիքինգի դեմ ձեռնարկված միջոցառումներով Վրաստանը կրկին բարձրագույն աստիճանում է և աշխարհի 184 երկրների շարքում արդեն 11-րդ տարին անընդմեջ պահպանում է իր տեղն այսպես կոչված առաջին զամբյուղում: Այս մասին տեղեկատվություն է տարածում Վրաստանի արդարադատության նախարարությունը:
Գերատեսչության տվյալներով՝ այս տարի գնահատման բարձրագույն սանդղակում տեղ է գտել ընդամենը 33 երկիր:
«Վրաստանը տարածաշրջանում և Եվրամիության անդամության թեկնածու պետությունների շարքում միակն է, որը զբաղեցնում է ԱՄՆ պետդեպարտամենտի գնահատման բարձրագույն նիշը: Եվրամիության անդամ պետություններից բարձրագույն՝ առաջին զամբյուղում չի հայտնվել 13 երկիր:
ԱՄՆ պետդեպարտամենտի զեկույցի համաձայն՝ Վրաստանը շարունակել է զգալի և կայուն ջանքերը հանցագործության դեմ, ինչն էլ պայմանավորել է երկրի բարձրագույն գնահատականը:
ԱՄՆ պետդեպարտամենտի զեկույցում ընդգծված են թրաֆիքինգի հանցագործության պրոակտիվ հայտնաբերման ու քննության, զոհերի և տուժողների պաշտպանության ու աջակցության մեխանիզմների, այդ թվում՝ հանցագործության հետևանքով պատճառված վնասի փոխհատուցման ուղղությամբ ձեռնարկված արդյունավետ քայլերը:
Վրաստանը զգալի ուշադրություն է դարձնում մարդկանց թրաֆիքինգի դեմ պայքարին, որը նաև Վրաստանի՝ Եվրամիությանն ինտեգրման գործընթացի կարևոր մասն է և ստեղծում է անդրազգային կազմակերպված հանցավորության դեմ պայքարի տեսանկյունից անվտանգ ու հուսալի միջավայր երկրում և տարածաշրջանում:
Վրաստանի կողմից ԱՄՆ պետդեպարտամենտի զեկույցում առաջատար դիրք գրավելը և հաշվետու ժամանակահատվածում արձանագրված առաջընթացը մարդկանց թրաֆիքինգի դեմ ուղղված միջոցառումներ իրականացնող միջգերատեսչական համակարգող խորհրդի արդյունավետ աշխատանքի արդյունքն է:
Խորհուրդը ղեկավարում է Վրաստանի արդարադատության նախարարը, և դրա կազմում ընդգրկված են բոլոր համապատասխան պետական գերատեսչությունների, Հանրային պաշտպանի ապարատի և գործընկեր կազմակերպությունների ներկայացուցիչները»,- նշված է Վրաստանի արդարադատության նախարարության տարածած տեղեկատվության մեջ: