Համաներելը նախագահի իրավունքն է, սակայն չեք կարող ժխտել, որ մեր քաղաքական թիմը հանրության հետ ստեղծել է այնպիսի ժողովրդավարություն, որտեղ ընդդիմությունը, կառավարող քաղաքական թիմը, քաղաքացիները կարող են ունենալ տարբեր դիրքորոշումներ նախագահի որոշման առնչությամբ, համաձայնել նրա հետ, կամ՝ ոչ,- այս մասին հայտարարել է Վրաստանի խորհրդարանի նախագահը «Պիրվելի» հեռուստաընկերության ուղիղ եթերում:

Արչիլ Թալակվաձեն արձագանքել է նախագահ Սալոմե Զուրաբիշվիլու կողմից ոստիկանի սպանության մեջ մեղադրվող անձին համաներմանը:

«Դեմ եմ այն մարդկանց համաներմանը, որոնք ձեռք են բարձրացրել ոստիկանի վրա, մեղավոր են ոստիկանի սպանության կամ ոստիկանի նկատմամբ ուժ կիրառելու մեջ: Ոստիկանի մասնագիտությունը շատ բարդ է, որը անհնար է փոխհատուցել աշխատավարձով, ուստի նրան անհրաժեշտ է հանրության գնահատականը: Երկու տարի աշխատել եմ ներքին գործերի նախարարությունում և գիտեմ, թե ինչ է նշանակում, լինել ոստիկան և քաջատեղյակ եմ, ինչ է զգում ոստիկանի ընտանիքը, երբ մնում է առանց ընտանիքի անդամի»,- հայտարարել է խորհրդարանի նախագահը: