Այսօր ևս մեկ անգամ հաստատվեց, որ Գիորգի Գախարիան առաջնորդվել է անձնական շահերով, և նա համոզել է իր ընկերներին անել նույնը, – լրագրողներին ասաց Վրաստանի խորհրդարանի խոսնակ Արչիլ Թալակվաձեն:

Ինչպես նշել է Արչիլ Թալակվաձեն, երբ համախմբումը, համատեղ որոշումները, երբ միասին աշխատելն ամենից շատ էր անհրաժեշտ, Գիորգի Գախարիան լքեց թիմը, իսկ հետո նրա ընկերները լքեցին խորհրդարանական մեծամասնությունը:

«Որպես խորհրդարանի խոսնակ՝ ես շնորհակալ եմ և գնահատում եմ այն ​​վերաբերմունքը, որ պատգամավորներն ինձ նախապես տեղեկացրեցին իրենց որոշման մասին: Ինչ վերաբերում է Գիորգի Գախարիային և նրա հետ մրցակցելուն, դա հիմնականում կախված կլինի նրանից, թե նա ինչ կուսակցություն կստեղծի, ով կլինի իր թիմում և ինչ քաղաքական հարթակ կընտրի: Հարցերը չափազանց շատ են, և այս հարցերի պատասխանները պետք է տրվեն: Կարծում եմ, ավելի շատ նյարդայնանալու առիթ ընդդիմությունը կունենա, ովքեր հրաժարվեցին խորհրդարանում լինելուց, ընտրեցին փողոցը: Փողոցի նախագիծը սնանկ է, քանի որ հասարակությունը չի աջակցում դրան: Դա այն է, ինչ տեղի է ունենում քաղաքականության մեջ, երբ ընդդիմությունը կորցնում է իր տեղը, այդ տեղը գրավում են ուրիշները, կլինի դա Գիորգի Գախարիան թե ոչ, ցույց կտա հաջորդ գործընթացը», – ասաց Արչիլ Թալակվաձեն:

Վրաստանի խորհրդարանի հինգ անդամներ այսօր լքել են «Վրացական երազանք» կուսակցությունը: