Արաբական Միացյալ Էմիրությունների հետաքննության նյութերի համաձայն՝ «Ֆլայդուբայի» երկրորդ օդաչուն ծրագրում էր «ինքնասպանական հարձակում»՝ ինքնաթիռի բախումը տերմինալին, որպեսզի զանգվածային զոհեր պատճառի

«Ֆլայդուբայի» օմանցի երկրորդ օդաչուն Դուբայ-Թել Ավիվ չվերթի ընթացքում «ինքնասպանական հարձակում» էր ծրագրում։ Այս մասին նշված է Արաբական Միացյալ Էմիրությունների հետաքննության նյութերում։

Արաբական Միացյալ Էմիրությունների դատախազության հայտարարությամբ՝ երկրորդ օդաչուն ծրագրում էր ինքնաթիռը բախել Բեն Գուրիոն օդանավակայանի ուղևորատար տերմինալին, որպեսզի զանգվածային զոհեր պատճառի։

Քննիչների խոսքով՝ կասկածյալը Թել Ավիվ կատարած երկու նախորդ այցերն օգտագործել է նախապատրաստական աշխատանքների շրջանակում թռիչքի երթուղուն և օդանավակայանին ծանոթանալու համար։ Նա քննիչներին հայտնել է, որ կանոնավորապես հաճախում էր Մելբուռնում գտնվող մզկիթ, որը կապված է Մելբուռնի տեխնոլոգիաների թագավորական ինստիտուտի (RMIT) հետ․ հենց այնտեղ է նա ծանոթացել այն կենտրոնի հետ կապված անձանց, որն ինքը «My Centre» էր անվանում։ Նրա խոսքով՝ կենտրոնը ղեկավարում էր լիբանանցի մի տղամարդ՝ Աբու Համզա մականունով, իսկ նրան աջակցում էր մի կազմակերպություն, որը կապ ուներ «Մուսուլման եղբայրների» հետ։

Արաբական Միացյալ Էմիրությունների գլխավոր դատախազ Համադ Սայֆ Ալ-Շամսին հայտարարել է, որ քննիչները կասկածյալի ռադիկալացման գործընթացը պարզել են 2017 թվականին՝ Ավստրալիայում նրա ուսանելու ընթացքում։ Դատախազների հայտարարությամբ՝ օմանցի կասկածյալն ավելի ուշ որդեգրել է բռնության և ահաբեկչության կողմնակից գաղափարներ և ոգեշնչում է ստացել 2001 թվականի սեպտեմբերի 11-ի հարձակումներից։