Ուկրաինայի արտաքին գործերի նախարար Անդրեյ Սիբիգայի խոսքով՝ Ռուսաստանի կողմից Ուկրաինայի վրա լայնածավալ հարձակումը Պեկինում ԱՄՆ-ի և Չինաստանի առաջնորդների հանդիպման ժամանակ ցույց է տալիս այն սպառնալիքը, որը ներկայացնում է ռուսական ռեժիմը միջազգային անվտանգության համար։

Ինչպես նշել է Անդրեյ Սիբիգան, հենց այն պահին, երբ աշխարհի ամենաազդեցիկ առաջնորդները հավաքվել էին Պեկինում, և աշխարհը հույս ուներ խաղաղության, կայունության և համագործակցության, Վլադիմիր Պուտինը հարյուրավոր անօդաչու թռչող սարքեր, բալիստիկ և թևավոր հրթիռներ արձակեց Ուկրաինայի մայրաքաղաքի ուղղությամբ։

«Այս բարբարոսական հարձակումը նման կարևոր գագաթնաժողովի ժամանակ ցույց է տալիս, որ ռուսական ռեժիմը համաշխարհային սպառնալիք է ներկայացնում միջազգային անվտանգության համար։ Խաղաղության և զարգացման փոխարեն Մոսկվան իրականացնում է ագրեսիա և ահաբեկչություն», – գրել է Ուկրաինայի արտաքին գործերի նախարարը։

Բացի այդ, նրա խոսքով, Ռուսաստանի նախագահը ցանկանում է շարունակել պատերազմը՝ սեփական երկրի վրա վերահսկողությունն ու իշխանությունը պահպանելու համար։

«Մենք չպետք է պատրանքներ կամ հույսեր ունենանք. միայն ճնշումը կարող է ստիպել Մոսկվային դադարեցնել։ Ես վստահ եմ, որ ԱՄՆ-ի և Չինաստանի առաջնորդները բավարար ազդեցություն ունեն Մոսկվայում՝ Պուտինին ասելու, որ վերջապես դադարեցնի պատերազմը։ Եվ դա կլինի ամենամեծ դրական փոփոխությունը», – նշել է Սիբիգան։