ԱՄՆ սահմանապահ պարեկության ղեկավարը հայտարարում է, որ Կալիֆոռնիայի նահանգապետը և Լոս Անջելեսի քաղաքապետը կարող են ձերբակալվել, եթե «հատեն սահմանը»
Կալիֆոռնիայի նահանգապետը և Լոս Անջելեսի քաղաքապետը կարող են ձերբակալվել, եթե «հատեն սահմանը», ասել է ԱՄՆ սահմանապահ պարեկության հանձնակատար Թոմ Հոմանը։
Հոմանը պաշտպանել է ԱՄՆ նախագահ Դոնալդ Թրամփի որոշումը՝ Լոս Անջելես տեղակայել Ազգային գվարդիայի 2000 զինվոր, չնայած տեղական ղեկավարների դիմադրությանը։
Կալիֆոռնիայի նահանգապետ Գևին Նյուսոմը մեղադրել է Թրամփի վարչակազմին «շոու» կազմակերպելու մեջ։
«Նախագահ Թրամփը Ազգային գվարդիա է ուղարկում, քանի որ նրանք կաջակցեն մեր իրավապահ մարմիններին, ինչը կօգնի պահպանել մեր հանրության անվտանգությունը։ Եկեք օգնենք այս հանցագործներին փողոցներից հեռացնել։ Դադարեք ծափահարել ցուցարարներին և աջակցեք մեր իրավապահ մարմիններին։ Նահանգապետ Նյուսոմը պետք է շնորհակալություն հայտնի նախագահ Թրամփին մեր նահանգի անվտանգությունը պահպանելու համար», – ասել է Թոմ Հոմանը։
Թրամփի վարչակազմի կողմից նշանակված Հոմանը նախկինում հայտարարել է, որ գործողությունները խափանելու փորձերը կարող են հանգեցնել ձերբակալությունների, և ո՛չ Նյուսոմը, ո՛չ էլ Լոս Անջելեսի քաղաքապետ Կարեն Բասը բացառություն չեն եղել։
«Ես խոսում եմ ցանկացածի մասին։ Անօրինական ներգաղթյալին գիտակցաբար թաքցնելը և ապաստան տալը հանցագործություն է։ Իրավապահ մարմիններին իրենց աշխատանքը կատարելուն խոչընդոտելը հանցագործություն է», – ասաց Թոմ Հոմանը։