ԱՄՆ Կոնգրեսի Ներկայացուցիչների պալատի հետախուզության կոմիտեն Լլոյդ Օսթինին կոչ է արել թույլ տալ Ուկրաինային հարձակվել ռուսական օբյեկտների վրա
ԱՄՆ Կոնգրեսի Ներկայացուցիչների պալատի հետախուզության հանձնաժողովը կոչ է արել պաշտպանության նախարար Լլոյդ Օսթինին թույլ տալ Ուկրաինային հարձակվել Ռուսաստանի տարածքում գտնվող թիրախների վրա։ Տեղեկությունը տարածում են ուկրաինական լրատվամիջոցները։
Միաժամանակ կոչում կոնգրեսականների խումբը Օսթինին կոչ է անում ընդլայնել ամերիկյան «F-16» կործանիչների վրա ուկրաինացի զինվորականների ուսուցման գործընթացը։
«12 օդաչուի պատրաստումը պարզապես բավարար չէ։ Ուկրաինան գտնվում է պատերազմական իրավիճակում և նրան պետք է առաջնահերթություն տալ այլ երկրների նկատմամբ»,- ասվում է կոչում։
Ամերիկացի օրենսդիրները կարծում են, որ Բայդենի վարչակազմի քաղաքականությունը պետք է փոխվի, քանի որ նշված քաղաքականությունը թույլ չի տալիս ուկրաինացիներին արդյունավետ պաշտպանվել։
Ներկայացուցիչների պալատի հետախուզության հանձնաժողովի նախագահ Մայք Թերների խոսքով՝ Ուկրաինային կարող է տրվել Ռուսաստանի տարածքում ռազմավարական թիրախների վրա հարձակվելու թույլտվություն «որոշակի պայմաններում»։
Օրենսդիրները նաև նշում են, որ Կիևը պահանջում է լրացուցիչ առնվազն յոթ Patriot համակարգեր՝ «մեծ քաղաքային տարածքները» պաշտպանելու համար: