ԱՄՆ-ի և Իրանի միջև միջուկային բանակցությունների երկրորդ փուլը, հավանաբար, կկայանա Հռոմում
ԱՄՆ-ի և Իրանի միջև միջուկային բանակցությունների երկրորդ փուլը, ինչպես սպասվում է, տեղի կունենա Հռոմում։ Այս մասին հաղորդում է Axios-ը։
Հրատարակության տվյալներով՝ բանակցությունները նախատեսված են ապրիլի 19-ին։
Չնայած բանակցությունների երկրորդ փուլը չի կայանա Օմանում, սակայն բանակցություններին ներկա կլինեն օմանցի միջնորդներ։ Բանակցությունների երկրորդ փուլից առաջ այս շաբաթ սպասվում է Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսի այցը Թեհրան։ Ակնկալվում է, որ Գրոսը կվերանայի գործակալության կողմից Իրանի միջուկային օբյեկտներում իրականացվող մոնիթորինգի և ստուգման գործունեությունը։
Հրատարակության տվյալներով՝ Թրամփի վարչակազմը գոհ է եղել Օմանում կայացած բանակցությունների առաջին փուլից, որը, նրանց կարծիքով, ընթացել է ըստ նախատեսվածի։ Սա ԱՄՆ-ի և Իրանի պաշտոնյաների միջև ութ տարվա ընթացքում առաջին բարձր մակարդակի երկխոսությունն էր։