Մենք դիմում ենք Ուկրաինայի համապատասխան կառույցներին, որ միջոցներ ձեռնարկեն «Դարիալի» սահմանային կետի այսպես կոչված չեզոք գոտում գտնվող իրենց քաղաքացիներին Ուկրաինա վերադարձնելու համար, – այս մասին ներքին գործերի նախարարի տեղակալ Ալեքսանդրե Դարախվելիձեն ասաց գերատեսչությունում կայացած ճեպազրույցի ժամանակ։

Դարախվելիձեի խոսքով՝ ՆԳՆ-ն պատրաստ է օգնել ուկրաինական կողմին այսպես կոչված չեզոք գոտում գտնվող անձանց հայրենիք վերադարձնելու գործընթացում, այդ թվում՝ փոխհատուցել այս անձանց վերադարձի համար անհրաժեշտ ծախսերը։

«Ցանկանում ենք հանրությանը տրամադրել մանրամասն տեղեկություն «Դարիալ» սահմանային անցակետում գտնվող անձանց մասին, ովքեր հայտարարում են, որ Ուկրաինայի քաղաքացիներ են և փորձում են հատել Վրաստանի պետական սահմանը ոչ վավեր փաստաթղթերով։ Նախևառաջ տեղեկացնում եմ, որ այս պահին «Դարիալի» սահմանային անցակետի այսպես կոչված չեզոք գոտում գտնվում է 87 անձ։ Պետական անվտանգության շահերից ելնելով՝ նշված անձանց երկրում մուտքի հնարավորություն չի տրվում, քանի որ բոլորն էլ ունեն ծանր քրեական անցյալ և մի քանի անգամ դատապարտված են եղել ծանր կամ առանձնապես ծանր հանցագործությունների համար։ Բացի այդ, նրանք չունեն սահմանը հատելու համար անհրաժեշտ վավեր փաստաթղթեր և չեն բավարարում Վրաստանի պետական սահմանի հատման չափանիշները։

Ստեղծված իրավիճակի լուծման համար, որը ենթադրում է «Դարիալի» սահմանային անցակետում գտնվող անձանց վերադարձ իրենց հայրենիք, վրացական կողմը մի քանի աշխատանքային հանդիպում է անցկացրել ինչպես Վրաստանում Ուկրաինայի դեսպանության, այնպես էլ միջազգային կազմակերպությունների ներկայացուցիչների հետ։ Նշված հարցի կարգավորման նպատակով կիրառվել է նաև ոստիկանության կցորդների ցանցը, որի շրջանակներում կապ է հաստատվել Ուկրաինայում Վրաստանի ոստիկանության կցորդի և Ուկրաինայի ներքին գործերի նախարարության միջև։ Վրացական կողմը ուկրաինական կողմին առաջարկել է մի քանի մեխանիզմ, թե ինչպես կարող է այսպես կոչված չեզոք գոտում գտնվող մարդկանց անվտանգ տեղափոխումն ու վերադարձը հայրենիք՝ Ուկրաինա, իրականանալ։ Մասնավորապես, մեր կողմից առաջարկվել են ինչպես օդային, այնպես էլ ծովային ճանապարհով վերադարձի տարբերակներ։

Ուկրաինական կողմը մինչ այժմ խուսափում է սահմանին գտնվող անձանց ծովային ճանապարհով վերադարձի մեխանիզմի կիրառումից։ Իսկ մինչ օրս մենք չենք ստացել վերջնական պաշտոնական հաստատում՝ նրանց հայրենիք կազմակերպված վերադարձի վերաբերյալ չարտերային թռիչքով։ Այնուամենայնիվ, հարկ է նշել, որ նախկինում եղել են նման անձանց տեղափոխման նախադեպեր․ ուկրաինական կողմի մասնակցությամբ՝ 2025 թվականի հունիս-հուլիսի ընթացքում Ռուսաստանի Դաշնությունից եկող մոտ 134 անձանցից 37-ը լքել են Վրաստանը Մոլդովայի ուղղությամբ, իսկ մոտ 10-ը՝ այլ ուղղություններով։

Նշված հանգամանքը ցույց է տալիս, որ համապատասխան կամքի առկայության և շահագրգիռ կողմերի ներգրավման դեպքում հնարավոր է չեզոք գոտում գտնվող անձանց անվտանգ վերադարձը հայրենիք։ Գործընթացի արհեստական ձգձգումը կասկած է առաջացնում, որ ուկրաինական կողմը ցանկանում է, որ այս մարդիկ երկար ժամանակ մնան այսպես կոչված չեզոք գոտում, որպեսզի հետագայում վրացական կողմը ստիպված լինի նրանց թույլատրել մուտք գործել Վրաստանի պետական սահման։ Մենք կտրականապես հայտարարում ենք, որ մեր երկրի բնակչության անվտանգությունը և օրինականությունը չենք դնի վտանգի տակ։ Նկատառելի է նաև այն փաստը, որ մի քանի օր առաջ «Դարիալի» այսպես կոչված չեզոք գոտում գտնվող մոտ 15 անձ հացադուլ էր անում․ բոլորը ցանկանում էին այս կերպ իրենց բողոքի ձայնը հասցնել Ուկրաինայի դեսպանության ներկայացուցիչներին, որպեսզի ուկրաինական կողմի աջակցությամբ և գործընկեր միջազգային կազմակերպությունների օժանդակությամբ ցանկացած ձևով վերադառնան հայրենիք՝ Ուկրաինա։ Մենք դիմում ենք Ուկրաինայի համապատասխան կառույցներին, որ անհապաղ միջոցներ ձեռնարկեն իրենց քաղաքացիների վերադարձը Ուկրաինա ապահովելու համար։

Վրաստանի ներքին գործերի նախարարությունը ևս մեկ անգամ արտահայտում է իր լիակատար պատրաստակամությունը՝ իրականացնել իր լիազորությունների շրջանակում բոլոր համապատասխան միջոցառումները և օժանդակել ուկրաինական կողմին այսպես կոչված չեզոք գոտում գտնվող անձանց հայրենիք վերադարձնելու գործընթացում, այդ թվում՝ պատրաստ ենք փոխհատուցել նշված անձանց վերադարձի համար անհրաժեշտ ծախսերը։ Վրաստանի ներքին գործերի նախարարությունը, Արտաքին գործերի նախարարության և բոլոր համապատասխան պետական կառույցների հետ միասին, իր լիազորությունների շրջանակում ձեռնարկում է անհրաժեշտ քայլեր, որպեսզի, մի կողմից, ապահովվի Վրաստանի բնակչության անվտանգությունը, և, մյուս կողմից, ժամանակին իրականացվի չեզոք գոտում գտնվող անձանց վերադարձը սեփական հայրենիք», – հայտարարել է Դարախվելիձեն։