Վրաստանի կրթության, գիտության և երիտասարդության նախարար Ալեքսանդր Ծուլաձեն մասնակցում է Թուրքիայի Հանրապետությունում անցկացվող «Կրթական տեխնոլոգիաների միջազգային գագաթնաժողովին և ցուցահանդեսին», որը բացել է Թուրքիայի նախագահ Ռեջեփ Թայիփ Էրդողանը։

Ալեքսանդր Ծուլաձեն գտնվում է Ստամբուլում Թուրքիայի կրթության ազգային նախարար Յուսուֆ Թեքինի հրավերով՝ տարբեր երկրների նախարարների հետ միասին։ Գագաթնաժողովի շրջանակում կայացած կոնֆերանսում նա հանդես է եկել ելույթով՝ ներկայացնելով իրականացված նախագծերն ու ապագա ծրագրերը, որոնք առնչվում են Վրաստանի կրթական համակարգի բոլոր երեք աստիճաններում ժամանակակից տեխնոլոգիաների ինտեգրմանը։

Նախարարի խոսքով՝ կրթությունը շարունակում է մնալ կայուն զարգացման ապահովման ամենահզոր գործիքներից մեկը։ Այդ պատճառով, նորարարությունների ներմուծման և թվային բաղադրիչի ուժեղացման նպատակով, նախարարությունը իրականացնում է մի շարք կարեւոր նախագծեր, որոնք ուղղված են աշակերտների և ուսանողների ժամանակակից հմտությունների զարգացմանը։ Իր ելույթում նա հատկապես ընդգծել է տեխնոլոգիական առաջընթացի և արհեստական բանականության (AI) դերը կրթության համակարգի թվային վերափոխման գործընթացում, ինչպես նաև այն մարտահրավերները, որոնք ուղեկցում են այդ փոխակերպմանը։

Ելույթի ավարտին Ալեքսանդր Ծուլաձեն խոսել է նման հանդիպումների կարևորության մասին և նշել, որ այս տարի Վրաստանը մասնակցել է մի շարք միջազգային ցուցահանդեսների և կոնֆերանսների։ Նման մասշտաբային միջոցառումները կարևոր հարթակ են երկրների միջև լավագույն փորձի և գիտելիքի փոխանակման համար։

Կոնֆերանսին մասնակցել են նաև Վրաստանի կրթության, գիտության և երիտասարդության նախարարի առաջին տեղակալ Գիորգի Մոդեբաձեն և տեղակալ Բայա Քվիցիանին։

Նշենք, որ 2025 թվականի գագաթնաժողովին մասնակցում են համաշխարհային մասշտաբի տեխնոլոգիական ընկերությունների ներկայացուցիչներ, այդ թվում՝ Nesta (Մեծ Բրիտանիայի նորարարությունների հիմնադրամ), AI in Education Association (Արհեստական բանականություն կրթության մեջ ասոցիացիա), OpenAI, Skype, Apple Siri, Shazam և այլք։

Տեղեկությունը տարածում է Կրթության նախարարության մամուլի ծառայությունը։