Նախօրեին Տրապիզոնի մերձակայքում տեղի ունեցած վթարի հետևանքով տուժած Վրաստանի հինգ քաղաքացիները բուժվում են թուրքական կլինիկաներում։ Նրանցից մեկի վիճակը ծանր է, իսկ տուժածներից մեկն այսօր կլքի կլինիկան։ Այդ մասին հայտարարել է Աջարիայի առողջապահության նախարար Նինո Նիժարաձեն, ով երեկ այցելել է Թուրքիայում վիրավորներին։

«Ավտովթարից տուժածների բուժման ծախսերն ամբողջությամբ կհոգա թուրքական կողմը։ Հիվանդներից մեկի վիճակը ծանր է, մեկը՝ թեթև, և նա այսօր կլքի կլինիկան, նրանցից երեքի վիճակը միջին ծանրության է և երկար բուժման կուրս է պահանջում»,- ասել է Նինո Նիժարաձեն։

Նախարարի խոսքով, տուժած Վրաստանի քաղաքացիները փոքր բիզնեսով են զբաղվել և Թուրքիայում գտնվել են անձնական գործունեությամբ։

Վթարը տեղի է ունեցել երեկ Տրապիզոնի մոտ, վեց ուղեւորներից մեկը՝ միջին տարիքի մի կին, տեղում մահացել է։