Վրաստանի ժողովրդական պաշտպան Նինո Լոմջարիան ժամանել է Ռուսթավի 12-րդ քրեակատարողական հիմնարկ՝ Միխեիլ Սաակաշվիլիին այցելելու նպատակով:

Ինչպես լրագրողներին ասել է Լոմջարիան, ինքը կհետաքրքրվի Սաակաշվիլիի՝ որպես կալանավորված անձի իրավական կարգավիճակով, և քաղաքական հարցեր չի ունենա:

«Ինձ կհետաքրքրի կալանավորվածի իրավական կարգավիճակը: Հավանաբար ձեզ նույնպես հետաքրքրում է նրա վիճակը: Դուք շատ հարցեր ունեք: Իմ լիազորությունների հիման վրա ես կարող եմ տեսնել ձերբակալված անձին և հրապարակել այս տեղեկատվությունը: Որպես կանոն, կալանավորներն իրենք են մեզ պատմում իրենց վիճակի մասին, արդյոք նրանք կարիք ունեն որևէ օգնության, այդ թվում՝ առաջնային բժշկական խնամքի, ինչպիսի՞ն էր վերաբերմունքը կալանքի ընթացքում և այլն: Ես շփվել եմ ներքին գործերի նախարարության հետ, և նրանք հաստատեցին, որ նա գտնվում է այս քրեակատարողական հիմնարկում: Ես նրա հետ քաղաքական հարցեր չեմ ունենա, եթե նա պատրաստ լինի ինչ-որ բան ասել, իհարկե, կլսեմ, ինձ հետաքրքրում է նրա վիճակը իրավական տեսանկյունից: Ես փաստաբանների հետ շփում չեմ ունեցել: Ընդհանրապես, հանգստյան օրերին փաստաբաններ չեն այցելում, բայց ես հույս ունեմ, որ հարցի հնչեղության պատճառով կլինի բացառություն», – ասել է Լոմջարիան:

Վրաստանի նախկին նախագահ, Ուկրաինայի բարեփոխումների գործադիր խորհրդի նախագահ Միխեիլ Սաակաշվիլին այսօր առավոտյան իր էջում գրառում է կատարել՝ նշելով, որ նա անօրինական կերպով է մուտք գործել երկիր և արդեն Վրաստանում է:

Միխեիլ Սաակաշվիլին հրապարակել է նաև մեկ այլ տեսանյութ, որտեղ ասում է, որ գտնվում է Բաթումիում:

Րոպեներ առաջ Վրաստանի վարչապետ Իրակլի Ղարիբաշվիլին հայտարարեց, որ Միխեիլ Սաակաշվիլին արդեն ձերբակալված է: