Բաշխիչ (դիստրիբյուտորական) տրանսպորտային միջոցներին թույլատրվելու է գիշերային ժամերին երթևեկել այսպես կոչված «բասլեյնով» (ավտոբուսի գծով)

Բաշխիչ (դիստրիբյուտորական) տրանսպորտային միջոցներին գիշերային ժամերին թույլ կտրվի տեղաշարժվել հատուկ ավտոբուսային գոտիներով (այսպես կոչված՝ «բասլայններով»)։ Այս փոփոխությունը մտցվում է Վարչական իրավախախտումների վերաբերյալ օրենսգրքում և «Ճանապարհային երթևեկության մասին» օրենքում։

Օրենսդրական փաթեթն այսօր խորհրդարանում քննարկվել է երկրորդ ընթերցմամբ։ Փոփոխությունների նախաձեռնողները կարծում են, որ գիշերային ժամերին բաշխիչ տրանսպորտի տեղաշարժը ավտոբուսային գոտիներով կնպաստի երթևեկության բեռնաթափմանը և կարող է ազդեցություն ունենալ նաև սպառողական գների վրա։

«Ներքին գործերի նախարարի հրամանով կսահմանվեն այն կանոններն ու պայմանները, որոնց պետք է համապատասխանի բաշխիչ տրանսպորտային միջոցը։ Նրանց հնարավորություն կտրվի գիշերային ժամերին՝ ժամը 01:00-ից մինչև 06:00-ն, կանգնել «բասլայնում»՝ բեռը փոխադրելու համար։ Իհարկե, մի կողմից դա կնպաստի երթևեկության բեռնաթափմանը, մյուս կողմից՝ փոխադրման համապատասխան ծախսերի կրճատումը, տրամաբանորեն, իր խոսքը կասի գների նվազման մասով։ Փոփոխություններն արտացոլված են ինչպես Վարչական իրավախախտումների վերաբերյալ օրենսգրքում, այնպես էլ «Ճանապարհային երթևեկության մասին» օրենքի նախագծում»,- հայտարարել է Վրաստանի խորհրդարանի իրավական հարցերի հանձնաժողովի նախագահ Արչիլ Գորդուլաձեն։

Բացի այդ, խորհրդարանի տնտեսական քաղաքականության հանձնաժողովի նախագահ Շոթա Բերեկաշվիլիի հայտարարությամբ՝ հարցի առնչությամբ հանդիպում է անցկացվել առևտրային ցանցերի և դիստրիբյուտորների ներկայացուցիչների հետ։

«Երեկ կարևոր հանդիպում ունեցանք ցանցերի և դիստրիբյուտորների հետ։ Քննարկում ունեցանք այն մասին, որ գիշերային ժամերին դիստրիբյուտորների համար հնարավոր դառնա երթևեկել «բասլայններով», որպեսզի նրանք իրականացնեն բաշխումը։ Բաշխման զգալի մասը ցերեկվանից կտեղափոխվի գիշեր, ինչը զգալիորեն կբեռնաթափի երթևեկությունը ցերեկային ժամերին։ Բացի այդ, գիշերային բաշխումն ավելի կենտրոնացված կլինի և էապես կնվազեցնի դիստրիբյուտորների ու ցանցերի ծախսերը, ինչն ինքնին կարտացոլվի սպառողական գների նվազման վրա»,- հայտարարել է Շոթա Բերեկաշվիլին։