Евроеидгыла арҭбаара амш аусхәаԥштә иалоуп, иҳаҩсыз амчыбжь азы Евроеидгыла ахеилак Украинеи Молдовеи, Қырҭтәылеи рԥеиԥш Евроеидгыла ауп ҳәа аӡбара аднакылеит, – иблог аҿы иҩит адәныҟатәии ашәарҭадаратәи политика азҵаарақәа рзы Евроеидгыла иреиҳаӡоу акомиссар Жозеф Борель.

“Украина алидерцәа иҟарҵаз аҳәамҭа инақәыршәаны, арратә адгылара мацара акәымкәа, Урыстәыла агрессиа аҽацәыхьчаразы Евроеидгыла акандидат статус аиура ауп приоритетқәа ирылоу. Абри еиԥш апозициа амоуп Молдовагьы.   Абри иубарҭоуп  Қырҭтәыла аиҳабыра иҟарҵаз аҳәамҭеи Евроеидгыла абираҟқәа кны Қарҭ амҩақәа рахь идәылҵыз зықьҩыла ақырҭуа демонстрантцәа рҳәамҭақәа рҿы”, – иҩит Борель.

Адәныҟатәии ашәарҭадаратәи политика азҵаарақәа рзы Евроеидгыла иреиҳаӡоу акомиссар ишазгәеиҭаз ала, Қырҭтәылеи Молдовеи, Украинеи мраҭашәаратәи Балканқәа ртәылақәеи ирыцныарҭбаара  Евроеидгыла астратегиатә интересқәа ирылоуп.

Борель иажәақәа рыла, арҭбаара афон аҿы ихымԥадатәиуп адәныҟатәи аполитикаҿ аидгылара апринцип аԥсахреи аӡбара абжьқәа реиҳарала адкылареи.