Арратә маҵзура  зықәнагоу Урыстәыла атәылауаа Қырҭтәыла-урыстәылатәи аҳәааҿы ааҧхьашәҟәқәа рырҭоит. Урыстәылатәи АИХ адыррақәа рыла, ари атәы аарыцҳаит Аҩадатәи Уаҧстәыла анапхгаҩы ипресс-маҵзура аҟынтәи.

«Қырҭтәылатәи аҳәааҿы аус руеит ааҧхьара азҵааразы  аоперативтә гәыҧ, уи иалоуп аркомат ахаҭарнакцәеи ахаҭарнакратә мчра аорганқәеи. Урыстәыла иалҵуа ауааҧсыра зегьы рдокументқәа гәарҭоит, ауаҩҧсы  арратә маҵзурахьы иааҧхьара ахәҭазар, уааҵәҟьа  ааҧхьашәҟәы ирҭоит», — аарыцҳаит апресс-маҵзураҟынтәи.

Урыстәылатәи АИХ адыррақәа рыла, арегион Аҩныҵҟатәи аусқәа рминистрра аинформациа инақәыршәаны, уажәазы урыстәыла-қырҭтәылатәи аҳәаа ахысразы Аҩадатәи Уаҧстәылаҿ агәаран иқәгылоуп  5,5 нызқь амашьынақәа,  урҭ рҟынтә  3600 амашьына ласқәа роуп.