Урыстәыла ашәарҭадаратә маҵзура аинформациала, Дариа Дугина лшьра Украина амаҵзура ҷыдақәа рнапы алакуп. Ари атәы аарыцаит урыстәылатәи аихқәа.

“Имҩаԥгаз аоперативтә-усԥшааратә уснагӡатәқәа ирылҵшәаны, Урыстәыла афедералтә шәарҭадаратә маҵзура ала аарԥшуп 1992 шықәсазы ииз аурыс журналит Дариа Дугина лшьра аус . Ацәгьаура еиҿкаан Украина амаҵзура ҷыдақәа рыла. Анагӡаҩ, 1979 шықәсазы ииз Украина атәылауаҩ Наталиа Вовк лоуп,”- иануп Урыстәыла ашәарҭадаратә маҵзура  аҳәамҭа аҿы.

Урыстәыла ашәарҭадаратә маҵзура адыррақәа рыла, Наталиа Вовк сынтәа, ԥхынгәы 22 рзы лыԥҳа, Софиа Шабан дылҭааит.

“Ауаҩшьра аныҟалаз аҽны Вовкии Шабани Дугина дахьыҟаз алитературатә-музыкатә фестиваль “Традициа” ахь дәықәлеит.  Нанәа 21 рзы Toyota Land Cruiser Prado амашьына аԥжәара ашьҭахь, Вовки лыԥҳаи Псковтәи аокруг ала, Естониа дәықәлеит”, – иануп аҳәамҭа аҿы.