Украина Адәныҟатәи аусқәа рминистрра Михаил Саакашвили идҳәаланы аҳәамҭа аланарҵәеит.

«Иацы Михаил Саакашвили Гори иҟоу агоспиталь аҟынтәи абахҭашҟа диаргар рҭахын, ари аҽазкра ииашамызт. Адукатцәа ари азы адырра рырымҭеит. Михаил Саакашвили игәабзиара аҭагылазаашьа макьана ҽеим. Иара  аиҭашьақәыргылара апроцесс наигӡароуп. Қырҭтәыла анапхгара рахь ааҧхьара ҟаҳҵоит Украина атәылауаҩ ишахәҭоу еиҧш изныҟәарц, иҧсҭазаареи игәабзиареи иаҧырхагахаша акгьы ҟарымҵарц.

Қырҭтәыла иҟоу украинатәи адипломатцәа ари аҭагылазаашьа иацклаҧшуеит.  Қырҭтәыла иҟоу Украина аконсул уаҵәы Михаил Саакашвили иахь днарышьҭуеит.

Ақырҭуа аган украинатәи аҳақьымцәа хымҧада Саакашвили иахь инарышьҭроуп.

Саакашвили Украинаҟа ирхынҳәра азҵааразы аусура наҳагӡоит. Лабҿаба иубарҭоуп ари ашьаҿа хымҧада ишыҟаҵатәу», — иануп Украина Адәныҟатәи аусқәа рминистрра аҳәамҭаҿы.