Венгриа аҧыза-министр Виктор Орбан иҳәамҭала, Қырҭтәыла Евроеидгыла алаларазы акандидат астатус амҭара иазку аӡбара адискриминациатә ҟазшьа амоуп, уи ақырҭуа жәлар ҳаҭыр рықәымҵароуп иаанаго.

 Қырҭтәыла аҧыза-министри иареи еицымҩаҧыргаз апрессконференциаҿы Орбан ишиҳәаз ала, абри аӡбара цәгьа аморалтә ганахьалагьы арқьиара ҟалом.

«Ҳазлацәажәаз азҵаарақәа иреиуп  Евроеидгыла алалара иазку Қырҭтәыла аҽазышәарақәа.  Ҳазынтәгьы иаадыруеит Бриуссель аӡбара цәгьа шрыдыркылаз, ари аӡбара адискриминациатә ҟазшьа амоуп ҳәа сҳәар сылшоит, избанзар,  Қырҭтәыла акәымкәа, Молдовеи Украинеи роуп астатус зырҭаз.  Ари аӡбара аморалатә ганахьалагьы арқьиара ҟалом.  Ари аӡбара цәгьоуп. Ҳасаси итәылеи акандидат астатус рыхәҭоуп. Ари аӡбарала ақырҭуа жәлари ақырҭуа ҳәынҭқарреи  пату шрықәрымҵо аадырҧшит.  Нас, ҳара иҟаҳҵои?! Ҳара Қырҭтәыла адгылара наҳагӡоит, ари атәыла излауа ала ирласны акандидат астатус аиуны, Евроеидгыла иалаларцаз.  Ҳара аексперттә цхыраарала ари аус анагӡара ҳалшоит. Евроеидгыла аҳәаақәа ирҭагӡаны Қырҭтәыла азҵаара аус адырулоит 16ҩык авенгрцәа, ҳара иҳалшо зегьы ҟаҳҵоит ари ахырхарҭала излауа ала ирласны аиҿцәажәарақәа иалагарцаз», — иҳәеит Виктор Орбан.